पोखरा । बडादशैँ तथा तिहारको अवसरमा स्थानीय युवाबीच आपसी सद्भाव, सामाजिक एकता र खेलकुद संस्कृतिको प्रवर्धन गर्ने उद्देश्यले डेभिजफल क्लब, पोखरा महानगरपालिका-१७, छोरेपाटनले ‘विजयादशमी तथा दीपावली रमाइलो टोलकप फुटबल प्रतियोगिता-२०८३’ आयोजना गरेको छ ।
क्लबका अध्यक्ष दीपक सुवेदीका अनुसार प्रतियोगिता २०८३ कात्तिक १४ गते बिहान ८ बजेदेखि पोखरा-१७ स्थित तिब्बती क्याम्पको फुटबल मैदानमा सञ्चालन हुनेछ । प्रतियोगितामा क्लबको कार्यक्षेत्रभित्रका टोलवासीले मात्र सहभागिता जनाउन पाउनेछन् ।
चाडपर्वलाई मनोरञ्जनमा मात्र सीमित नराखी स्थानीय समुदायबिच परिचय विस्तार, आपसी भाइचारा अभिवृद्धि र युवालाई रचनात्मक गतिविधिमा सहभागी गराउने उद्देश्यले प्रतियोगिता आयोजना गर्न लागिएको अध्यक्ष सुवेदीले बताउनुभयो ।
खेलकुदमार्फत स्वस्थ प्रतिस्पर्धाको भावना विकास गर्नुका साथै स्थानीयस्तरमा सामाजिक सम्बन्ध थप सुदृढ बनाउने अपेक्षा गरिएको उहाँले उल्लेख गर्नुभयो ।
सुवेदीले चाडपर्वका अवसरमा आयोजना गरिने यस्ता कार्यक्रमले स्थानीय समुदायमा आत्मीयता, खुसी र सामाजिक सद्भाव अभिवृद्धि गर्न सहयोग पुर्याउने बताउनुभयो ।
प्रतियोगितालाई अनुशासित, मर्यादित र व्यवस्थित रूपमा सम्पन्न गर्न सम्पूर्ण टोलवासी, खेलप्रेमी तथा शुभेच्छुकको सहयोग आवश्यक रहेको उहाँको भनाइ छ ।
क्लबका सचिव गणेश जिसीले युवालाई सकारात्मक तथा रचनात्मक गतिविधिमा सहभागी गराउन प्रतियोगिताले महत्त्वपूर्ण भूमिका खेल्ने विश्वास व्यक्त गर्नुभयो ।
उहाँले क्लबको कार्यक्षेत्रभित्रका टोलहरूलाई प्रतियोगितामा सक्रिय सहभागिता जनाउन र निर्धारित समयभित्र टोली दर्ता गराउन आग्रह गर्नुभयो ।
क्लबका कोषाध्यक्ष शिवम शाहीले प्रतियोगिता सञ्चालनका लागि आवश्यक तयारी तथा पुरस्कार व्यवस्थापनमा ध्यान दिइएको बताउनुभयो ।
उहाँले प्रतियोगितालाई सफल बनाउन स्थानीयवासी तथा खेलप्रेमीबाट सहयोग र उत्साहजनक सहभागिताको अपेक्षा गरिएको उल्लेख गर्नुभयो ।
दुई उमेर समूहमा प्रतिस्पर्धा
प्रतियोगितामा खेलाडीको उमेरका आधारमा दुई विधामा प्रतिस्पर्धा गराइनेछ । पहिलो विधामा ३५ वर्षमाथिका खेलाडीबिच भेट्रान्स प्रतियोगिता हुनेछ भने दोस्रो विधामा ३५ वर्षमुनिका खेलाडीले प्रतिस्पर्धा गर्नेछन् ।
दुवै विधाका विजेता टोलीलाई एउटा एउटा बोका, ट्रफी र मेडल प्रदान गरिनेछ । त्यसैगरी, उपविजेता टोलीलाई दुई दुई ओटा कुखुरा, ट्रफी र मेडल प्रदान गरिने आयोजकले जनाएको छ ।
कात्तिक १३ गतेसम्म टोली दर्ता गर्नुपर्ने
प्रतियोगितामा सहभागी हुन इच्छुक टोलीले प्रतिटिम २ हजार रुपियाँ दर्ता शुल्क बुझाउनुपर्नेछ । टोली दर्ताको अन्तिम म्याद २०८३ कात्तिक १३ गते शुक्रबार बेलुकासम्म तोकिएको क्लबले जनाएको छ ।
क्लबले आफ्नो कार्यक्षेत्रभित्रका सम्पूर्ण टोलवासीलाई प्रतियोगितामा सहभागी भई कार्यक्रम सफल बनाउन आग्रह गरेको छ ।
स्थानीय युवाको सक्रिय सहभागिता, टोलवासीको सहयोग र खेलप्रेमीको उपस्थितिले प्रतियोगितालाई थप उत्साहपूर्ण बनाउने विश्वास आयोजकले लिएको छ ।
स्थानीयस्तरमा खेलकुद गतिविधिको विस्तारसँगै सामाजिक एकता र सामुदायिक सहकार्यलाई प्राथमिकता दिँदै आयोजना गर्न लागिएको प्रतियोगिताले चाडपर्वका अवसरमा टोलवासीलाई एकै ठाउँमा जोड्ने साझा मञ्चका रूपमा भूमिका खेल्ने अपेक्षा गरिएको छ ।
