गुल्मी । रेसुङ्गा नगरपालिका-४ अन्तर्गत पर्ने निउरेनी-ढाक्रेखोला-रागेढुङ्गा क्षेत्रमा बेमौसमी वर्षापछि मोटरबाटो सञ्चालनमा गम्भीर समस्या उत्पन्न भएको छ ।
२०८३ वैशाख १७ गतेदेखि लगातार परेको वर्षाका कारण सडक हिलाम्मे र जोखिमपूर्ण बनेपछि यातायात आवागमन ठप्प भएको स्थानीय नारायण पन्थीले जानकारी दिनुभयो ।
स्थानीयवासीका अनुसार वर्षायाम सुरु हुनुअघि सडक मर्मत तथा स्तरोन्नति गर्नुपर्नेमा सम्बन्धित निकायले आवश्यक ध्यान नदिँदा समस्या थप जटिल बनेको हो ।
“पहिले नै मर्मत गरिएको भए यस्तो अवस्था आउने थिएन ।”-एक स्थानीयले मानव अवाजसँग भने ।
सडक अवरुद्ध हुँदा बिरामीलाई अस्पताल लैजान कठिन भएको छ भने दैनिक उपभोग्य वस्तु ढुवानीमा समेत समस्या उत्पन्न भएको छ । कृषकहरूको उत्पादन बजारसम्म पुर्याउन नसक्दा आर्थिक क्षति बेहोर्नुपरेको स्थानीयको भनाइ छ ।
यस विषयमा पटकपटक रेसुङ्गा नगरपालिका कार्यालयको ध्यानाकर्षण गराइए पनि प्रभावकारी पहल नभएको आरोप स्थानीयवासीको छ ।
उनीहरूले तत्काल सडक मर्मत गरी यातायात सञ्चालन सहज बनाउन सम्बन्धित निकायसँग माग गरेका छन् ।
