रूद्रबहादुर खड्का, सिन्धुली ।
सिन्धुलीको कमलामाई नगरपालिका–४ धुराफाँटकी ३२ वर्षीया सुशीला बम्जनको हत्या प्रकरणले जिल्लाको अवस्था तनावग्रस्त बनेको छ ।
सुशीलामाथि सासू, ससुरा र नन्दले घरभित्रै पेट्रोल छर्केर आगजनी गर्दा २०८२ पुस ६ गते घटनास्थलमै मृत्यु भएको प्रहरीले जनाएको छ ।
न्यायको माग गर्दै मृतकका आफन्त तथा स्थानीयले विगत ६ दिनदेखि आन्दोलन गर्दै आएका छन् ।
सुशीलाको घरबाट सरसामान निकाल्न खोजिएको भन्दै आक्रोशित भिडले २०८२ पुस १० गते तोडफोड र आगजनी प्रयास गरेपछि स्थिति झनै तनावपूर्ण बनेको थियो । सो क्रममा प्रहरीसहित १० जना घाइते भएका छन् ।
स्थिति नियन्त्रणमा लिन जिल्ला प्रशासन कार्यालयले करिब १० घण्टा कर्फ्युसमेत जारी गर्नुपरेको थियो ।
२०८२ पुस ११ गते सर्वदलीय/सर्वपक्षीय बैठकले पीडितलाई न्याय दिने र दोषीलाई कडा कारबाही गर्ने सहमति गरेको छ ।
सिन्धुली प्रहरी प्रमुख लालध्वज सुवेदीले घटनाको निष्पक्ष अनुसन्धान भइरहेको भन्दै कुनै कमजोरी नहुने स्पष्ट पार्नु भयो । यद्यपि पीडित पक्षले मुख्य आरोपित पक्राउ नपरेसम्म सुशीलाको शव नबुझ्ने अडान लिएका छन् ।
