रुद्रबहादुर खड्का, हेटौंडा
‘मानव अधिकार हामी सबैको अपरिहार्य आधार’ भन्ने मूल नाराका साथ बागमती प्रदेशको हेटौंडामा ७७ औँ अन्तर्राष्ट्रिय मानव अधिकार दिवसका अवसरमा अन्तरक्रियात्मक छलफल कार्यक्रम सम्पन्न भएको छ ।
कार्यक्रम राष्ट्रिय मानव अधिकार आयोग बागमती प्रदेश कार्यालय, गैरसरकारी संस्था महासंघ नेपाल बागमती प्रदेश र इन्सेक बागमती प्रदेशको संयुक्त आयोजनामा तथा मानव अधिकार संरक्षण तथा मानव बेचविखन विरुद्धको सञ्जाल, मकवानपुर र प्रदेशस्तरीय मानव अधिकार रक्षक सञ्जालको सहकार्यमा सञ्चालन गरिएको हो ।
कार्यक्रममा बागमती प्रदेशसभाकी उपसभामुख अप्सरा चापागाईंले नेपालको संविधानले मानव अधिकारलाई मौलिक हकका रूपमा व्यवस्था गरेको उल्लेख गर्दै, लोकतान्त्रिक आन्दोलनबाट प्राप्त उपलब्धिहरूको संरक्षण तथा विकास गर्न सबैको दायित्व रहेको बताउनु भयो ।
उहाँले मानव अधिकार उल्लङ्घन भएका घटनामा छानबिन तथा अनुसन्धान प्रभावकारी बनाउनुपर्नेमा जोड दिँदै, पिडकलाई कारबाही र पीडितलाई न्याय तथा राहत प्रदान गर्नु राज्यको कर्तव्य रहेको स्पष्ट पार्नु भयो ।
उपसभामुख चापागाईंले मानव अधिकार पाँचौँ राष्ट्रिय कार्ययोजना कार्यान्वयन अवस्थाको अनुगमन गरी मानव अधिकार सुधारका लागि सरकार सक्रिय बन्नुपर्ने आवश्यकता औंल्याउनु भयो ।
राष्ट्रिय मानव अधिकार आयोग बागमती प्रदेश कार्यालय हेटौंडाका प्रमुख चन्द्रकान्त चापागाईंले मानव अधिकार ऐन तथा अन्तर्राष्ट्रिय मान्यता अनुसार दिगो विकासका लक्ष्य सबैको मानव अधिकार सुनिश्चिततामा जोडिएको उल्लेख गरे ।
उहाँका अनुसार पछाडि पारिएका जातजाति, लक्षित वर्ग, अल्पसङ्ख्यक तथा लैङ्गिक–यौनिक समुहको अधिकार सुनिश्चित गर्दै न्यायपूर्ण, सुरक्षित र दिगो शान्तियुक्त नयाँ नेपाल निर्माण गर्नुपर्ने आवश्यकता छ ।
इन्सेक बागमती प्रदेशका संयोजक शिवप्रसाद खकुरेलले मानव अधिकार विश्वव्यापी घोषणा पत्रमा उल्लेखित धारणाहरू सबैले बुझ्नुपर्नेमा जोड दिनु भयो ।
उहाँले लैङ्गिक हिंसा न्यूनीकरण, मानव अधिकार अनुगमन, अभिलेखीकरण तथा उल्लङ्घन भएका घटनामा पीडितलाई न्याय दिलाउने प्रक्रियामा सबै निकाय सक्रिय हुनुपर्ने बताउनु भयो ।
कार्यक्रममा बागमती प्रदेशको मानव अधिकार अवस्थाबारे राष्ट्रिय मानव अधिकार आयोगकी अधिकृत रविना घिमिरेले कार्यपत्र प्रस्तुत गर्नु भयो ।
गैरसरकारी संस्था महासङ्घ नेपाल बागमती प्रदेशका अध्यक्ष कमलकुमार विश्वकर्माले मानव अधिकार र आम निर्वाचन विषयक कार्यपत्र प्रस्तुत गर्नु भयो ।
