काठमाडौँ । विश्व फुटबलका महान् खेलाडीमध्ये एक क्रिस्टियानो रोनाल्डोले पोर्चुगलको राष्ट्रिय फुटबल टोलीबाट सन्यासको घोषणा गर्नुभएको छ ।
२०८३ कात्तिक १९ गते सामाजिक सञ्जालमार्फत भिडियो सन्देश जारी गर्दै ४१ वर्षीय रोनाल्डोले २३ वर्ष लामो अन्तर्राष्ट्रिय फुटबल यात्रालाई टुङ्ग्याउने निर्णय सार्वजनिक गर्नुभएको हो ।
राष्ट्रिय टोलीको प्रतिष्ठित सात नम्बरको जर्सी अब नयाँ पुस्तालाई हस्तान्तरण गर्ने समय आएको उल्लेख गर्दै उहाँले पोर्चुगलका लागि खेल्न पाउनु आफ्नो जीवनकै विशेष गौरव भएको बताउनुभएको छ ।
सन् २००३ अगस्टमा काजकिस्तानविरुद्ध खेल्दै अन्तर्राष्ट्रिय फुटबलमा पदार्पण गरेका रोनाल्डोले पोर्चुगलका लागि २३४ खेल खेलेर १४६ गोल गर्नुभएको छ ।
पुरुष अन्तर्राष्ट्रिय फुटबलमा सर्वाधिक खेल खेल्ने र सर्वाधिक गोल गर्ने दुवै विश्व कीर्तिमान रोनाल्डोकै नाममा छन् ।
उहाँले आफ्नो सन्देशमा २३ वर्षसम्म राष्ट्रिय टोलीको जर्सी लगाउने, त्यसको रक्षा गर्ने र विश्वका विभिन्न रङ्गशालामा पोर्चुगलको प्रतिनिधित्व गर्ने अवसर पाएकोमा खुसी व्यक्त गर्नुभएको छ । साथै समर्थक, सहकर्मी खेलाडी, प्रशिक्षक तथा टोलीसँग जोडिएका सबैप्रति आभार प्रकट गर्नुभएको छ ।
राष्ट्रिय टोलीबाट सन्यास लिए पनि रोनाल्डोले व्यावसायिक क्लब फुटबल भने जारी राख्नुहुनेछ । उहाँ हाल साउदी अरेबियाको अल नासरबाट खेलिरहनुभएको छ । उहाँको अबको लक्ष्य करियरका कुल गोल सङ्ख्या १ हजार पुर्याउनु रहेको छ ।
पोर्चुगलका लागि ऐतिहासिक योगदान
रोनाल्डोको कप्तानीमा पोर्चुगलले सन् २०१६ मा पहिलोपटक युरोपियन च्याम्पियनसिपको उपाधि जितेको थियो । त्यसैगरी सन् २०१९ र २०२५ मा यूईएफए नेसन्स लिगको उपाधि पनि जित्यो ।
उहाँको अन्तर्राष्ट्रिय यात्रामा व्यक्तिगत कीर्तिमानसँगै राष्ट्रिय टोलीलाई दिलाएका उपाधि र विश्वभरका समर्थकसँग जोडिएको भावनात्मक सम्बन्ध पनि महत्त्वपूर्ण उपलब्धिका रूपमा रहेका छन् ।
पोर्चुगल फुटबल महासङ्घले पनि रोनाल्डोको योगदानको उच्च प्रशंसा गर्दै उहाँको बिदाइलाई विशेष सम्मानसहित मनाउने जनाएको छ ।
२३ वर्षसम्म सात नम्बरको जर्सीमा मैदानमा देखिनुभएका रोनाल्डो अब पोर्चुगलको राष्ट्रिय टोलीबाट खेलाडीका रूपमा देखिनुहुने छैन । तर, क्लब फुटबलमा उहाँको यात्रा जारी रहने बताइएको छ । (फोटोः एआइ जेनेरेटेड)
फिफा, रोयटर्स र यूईएफए को सहयोगमा
