पोखरा । रोट्रयाक्ट क्लब अफ पोखरा मिडटाउनको २३औँ पदस्थापना कार्यक्रम २०८३ साउन ३० गते पोखरामा सम्पन्न भएको छ ।
रोटरी इन्टरनेशनल डिस्ट्रिक्ट ३२९२, नेपाल-भुटानअन्तर्गत जोन १६ मा रहेको क्लबले नयाँ कार्यसमितिलाई औपचारिक रूपमा पदस्थापना गर्दै नयाँ कार्यकालको सुरुवात गरेको हो ।
कार्यक्रममा रोट्रयाक्ट क्लब अफ पोखरा मिडटाउनका वर्ष २०२६/२७ का अध्यक्ष रोट्रयाक्ट इन्जिनियर नबिनचन्द्र थापाले पदभार ग्रहण गर्नुभयो ।
निवर्तमान अध्यक्ष रोट्रयाक्ट इन्जिनियर गणेश रिमालले आफ्नो कार्यकाल सफलतापूर्वक सम्पन्न गरी नयाँ नेतृत्वलाई जिम्मेवारी हस्तान्तरण गर्नुभयो ।
पदस्थापनाका क्रममा निवर्तमान अध्यक्ष रिमालले आफ्नो कार्यकालमा क्लबले सञ्चालन गरेका सामाजिक सेवा, सामुदायिक विकास, वातावरण संरक्षण तथा मानवीय सेवासम्बन्धी विभिन्न गतिविधिबारे जानकारी गराउँदै नयाँ नेतृत्वलाई सफल कार्यकालको शुभकामना दिनुभयो ।
नवनिर्वाचित अध्यक्ष थापाले क्लबका विगतका सफल सामाजिक तथा सामुदायिक सेवाका कार्यक्रमलाई निरन्तरता दिँदै थप प्रभावकारी र आवश्यकतामुखी परियोजना सञ्चालन गर्ने प्रतिबद्धता व्यक्त गर्नुभयो ।
उहाँले युवा नेतृत्व विकास, समुदाय सेवा, वातावरण संरक्षण तथा सामाजिक उत्तरदायित्वलाई प्राथमिकतामा राख्दै क्लबलाई थप सक्रिय र प्रभावशाली बनाउने बताउनुभयो ।
क्लबले शिक्षा, स्वास्थ्य, वातावरण, युवा नेतृत्व विकास तथा समुदाय केन्द्रित विभिन्न सामाजिक गतिविधिलाई आगामी कार्यकालमा प्राथमिकताका साथ अघि बढाउने अध्यक्ष थापाले जानकारी दिनुभयो ।
नयाँ सोच, नयाँ परियोजना र युवाको सक्रिय सहभागितामार्फत समुदायमा सकारात्मक परिवर्तन ल्याउने लक्ष्य क्लबले लिएको उहाँको भनाइ थियो ।
कार्यक्रममा रोटरी तथा रोट्रयाक्टको ‘Service Above Self’ को भावनालाई आत्मसात् गर्दै सामाजिक सेवामार्फत समुदायसँग अझ नजिक भएर काम गर्ने प्रतिबद्धता व्यक्त गरिएको थियो ।
समारोहमा निवर्तमान नेतृत्वलाई सम्मानसहित बिदाइ गर्दै नयाँ नेतृत्वलाई जिम्मेवारी हस्तान्तरण गरिएको थियो ।
कार्यक्रमले क्लबका सदस्यबीच आपसी एकता, सहकार्य र सेवाभावलाई थप मजबुत बनाउँदै आगामी कार्यकालका लागि नयाँ ऊर्जा र उत्साह प्रदान गरेको आयोजकले जनाएको छ ।
कार्यक्रममा क्लबका सदस्य, रोट्रयाक्ट तथा रोटरी परिवारका प्रतिनिधि र विभिन्न संघ–संस्थाका पदाधिकारीहरूको उल्लेखनीय उपस्थिति रहेको थियो ।
