पोखरा । सीमान्तकृत महिलाहरूको सञ्चार सीप, सार्वजनिक प्रस्तुति क्षमता तथा नेतृत्व विकासमा टेवा पुर्याउने उद्देश्यले आयोजित उद्घोषण तथा भाषणकला सम्बन्धी तालिम सम्पन्न भएको छ ।
मानव अधिकारका लागि दलित महिला सशक्तीकरण नेपाल, कास्कीको आयोजनामा तथा पोखरा महानगरपालिका–२६ को आर्थिक सहयोगमा सञ्चालन गरिएको उक्त तालिम २०८३ जेठ २४ गते सम्पन्न भएको हो ।
कार्यक्रमका प्रमुख अतिथि पोखरा महानगरपालिका–२६ का वडा अध्यक्ष नरेन्द्रबहादुर थापाले तालिमले महिलाहरूलाई सार्वजनिक रूपमा आफ्ना विचार प्रभावकारी ढङ्गले प्रस्तुत गर्ने सीप र नेतृत्व क्षमता विकास गर्न सहयोग पुग्ने बताउनुभयो ।
उहाँले सीमान्तकृत महिलाको सशक्तीकरण, नेतृत्व विकास तथा सामाजिक सहभागिता अभिवृद्धिका लागि यस्ता कार्यक्रम महत्वपूर्ण हुने विश्वास व्यक्त गर्नुभयो ।
तालिममा पत्रकार दिपक परियारले उद्घोषण, सार्वजनिक भाषणकला, नेतृत्व विकास, कानुनी प्रावधान, आत्मविश्वास अभिवृद्धि तथा व्यक्तित्व विकासलगायत विषयमा प्रशिक्षण दिनुभएको थियो ।
कार्यक्रममा वडा सदस्य राधा बराल तथा सुजता बरालले तालिमले महिलाहरूलाई आफ्ना विचार स्पष्ट र प्रभावकारी रूपमा व्यक्त गर्न प्रेरित गर्ने धारणा राख्नुभयो ।
मानव अधिकारका लागि दलित महिला सशक्तीकरण नेपालका अध्यक्ष इश्वरी बिकको अध्यक्षतामा सम्पन्न कार्यक्रममा अञ्जना बिकले स्वागत मन्तव्यसहित कार्यक्रमको उद्देश्यबारे प्रकाश पार्नुभएको थियो। कार्यक्रमको सञ्चालन संस्थाकी सदस्य बबिता बिकले गर्नुभएको थियो ।
तालिममा वडा कार्यालयका प्रतिनिधि, सामाजिक अगुवा तथा स्थानीय महिलासहित ६५ जनाको सहभागिता रहेको आयोजकले जनाएको छ ।
कार्यक्रममा महिलाहरूको नेतृत्व विकास, समावेशी विकास र लैङ्गिक समानताको लक्ष्य हासिल गर्न यस्ता तालिम प्रभावकारी हुने अपेक्षा व्यक्त गरिएको थियो ।
