आलु महोत्सवमा ‘आलु’ छैन, विद्यालय परिसरमा रक्सीको व्यापार !

पोखरा । पोखरा महानगरपालिका-२५ हेमजामा धुमधामका साथ ‘आलु महोत्सव’ सुरु भएको छ । प्रवेशद्वारमा आलुका परिकारका आकर्षक तस्बिर र कृषि प्रवर्धनका नाराले सजिएको महोत्सव परिसरभित्र पस्नेबित्तिकै फरक दृश्य देखिन्छ ।

महोत्सवको नाम ‘आलु’ भए पनि त्यहाँ राखिएका स्टलहरूको वास्तविकता भने विपरीत छ । करिब दर्जनौँ स्टलमध्ये आलुसँग प्रत्यक्ष सम्बन्धित स्टल भने दुई ओटा मात्र देखिन्छन् ।

बाँकी अधिकांश स्टलहरूमा कपडा, रेडिमेड सामग्री, रेस्टुरेन्ट शैलीका मःम, चाउमिन, खाजा तथा पेय पदार्थको व्यापार भइरहेको छ ।

स्थानीय कृषकका लागि बजार विस्तार र उत्पादन प्रवर्धन गर्ने उद्देश्यले आयोजना गरिएको भनिएको यस महोत्सवमा कृषि उत्पादनभन्दा व्यापारिक गतिविधि बढी हावी देखिएको छ ।

सस्तो मूल्यमा आलु किन्न र आलुका परिकार चाख्ने अपेक्षासहित आएका दर्शक निराश बनेका छन् । उनीहरूको गुनासो अनुसार आलुभन्दा मःम र कपडाको व्यापार बढी देखिएको छ ।

२०८२ चैत्र २७ गतेदेखि २०८३ वैशाख ५ गतेसम्म सञ्चालन हुने राष्ट्रिय हेमजा आलु महोत्सवमा कानुनले निषेध गरेको रक्सी-बियरको खुल्लमखुल्ला बिक्री तथा सेवन समेत गरिएको पाइएको छ ।

नेपालको कानुन अनुसार शिक्षण संस्थाको १ सय मिटर वरिपरि धूम्रपान तथा मद्यपानको कारोबार गर्न पाइँदैन ।

विष्णुपादुका माध्यमिक विद्यालय परिसरमा सञ्चालन भइरहेको उक्त महोत्सवमा विद्यालय भवन अगाडिकै चौरमा राखिएका खाजा घरहरूमा रक्सी र बियर बिक्री भइरहेको देखिएको छ ।

सरकारी विद्यालय परिसरमा आयोजित महोत्सवमै यसरी कानुन उल्लङ्घन हुनु गम्भीर विषय बनेको छ । अझ चासोको विषय के छ भने महोत्सवको उद्घाटन पोखरा महानगरपालिकाका मेयर धनराज आचार्यले गर्नुभएको थियो ।

स्वीकृति दिँदा निषेधित कार्य नगर्ने सर्त राखिए पनि त्यो औपचारिकतामा मात्र सीमित भएको देखिन्छ ।