पोखरा । “हाम्रो कर्तव्य, हाम्रो जिम्मेवारी, आँखा सेवामा साझेदार” नाराका साथ नेपाल नेत्रज्योति सङ्घ अन्तर्गत सञ्चालित हिमालय आँखा अस्पताल, पोखरा-१७ ले आफ्नो ३३औँ वार्षिकोत्सव २०८२ फागुन १७ गते औपचारिक कार्यक्रमका बिच मनाउँदै ३४औँ वर्षमा प्रवेश गरेको छ ।
वार्षिकोत्सव समारोहमा बोल्दै नेपाल नेत्रज्योति सङ्घका केन्द्रीय उपाध्यक्ष प्रा.डा. दिलबहादुर क्षेत्रीले अस्पताल स्थापना (२०४९ साल) देखि हालसम्म झन्डै ४३ लाख नागरिकलाई सेवा प्रदान गरिसकेको जानकारी दिनु भयो ।
उहाँका अनुसार गण्डकी र कर्णाली प्रदेशमा २७ ओटा उपचार केन्द्र र दुई ओटा सहायक अस्पतालमार्फत सेवा विस्तार गरिएको छ ।
पोखरा महानगरपालिकाका प्रमुख धनराज आचार्यले अस्पतालको भौतिक पूर्वाधार विकासमा महानगरले सहयोग गर्ने प्रतिबद्धता जनाउँदै यस संस्थालाई स्वास्थ्य पर्यटनसँग जोड्नुपर्नेमा जोड दिए । पूर्वाधारमा सरकारी सहयोग बढे थप सेवा विस्तार गर्न सकिने उहाँले बताउनु भयो ।
अस्पताल व्यवस्थापन समिति अध्यक्ष वरिष्ठ अधिवक्ता सुरेन्द्र थापामगरका अनुसार ३९ कर्मचारीबाट सुरु भएको अस्पतालमा हाल १२५ जना दक्ष नेपाली जनशक्ति कार्यरत छन् ।
साथै, पोखरा–१७ का बासिन्दालाई सहयोग पुर्याउने उद्देश्यले उपचार दर्ता शुल्क निःशुल्क गर्ने घोषणा पनि गरिएको छ ।
अस्पतालका मेडिकल डाइरेक्टर डा. बबिता गुरुङका अनुसार सन् २०२५ मा मात्रै २ लाख ४७ हजार ५ सय ८५ जनाले सेवा लिएका छन् भने १५ हजार ८ सय ४१ जनाको शल्यक्रिया गरिएको छ।
कार्यक्रममा नेपाल नेत्रज्योति सङ्घका केन्द्रीय अध्यक्ष प्रा.डा. चेतराज पन्त, महासचिव भरतबहादुर चन्द, पोखरा-१७ की वडाध्यक्ष राधिका कुमारी शाही योगी, आई केयर फाउन्डेसनका कन्ट्री डाइरेक्टर अनिल गोर्खालीलगायत विभिन्न सङ्घसंस्थाका प्रतिनिधिहरूले शुभकामना मन्तव्य व्यक्त गरेका थिए ।
वार्षिकोत्सवका अवसरमा उत्कृष्ट कर्मचारीका रूपमा डा. अनिल पराजुली, अनुप सुवेदी, उमा सुनुवार र विकल श्रेष्ठ सम्मानित हुनु भयो । ‘जनरल ओपिडी भिजन एण्ड रिफ्र्याक्सन युनिट’ विभागलाई पनि सम्मान गरिएको थियो ।
लामो समयदेखि योगदान पुर्याउने कर्मचारीहरू-गोविन्दनाथ योगी, मन्जु आचार्य, गोविन्दराज बडु, विजय पौडेल, शशिकमला लामिछाने, तेजबहादुर गुरुङ, रीना गुरुङ, धर्मेन्द्रकुमार घोडासैनी, रुपसिंह बोहोरा, दीप गुरुङ, तस्बिरन मियाँ, दीपिका गुरुङ र दीपा शाहीलाई सम्मान गरिएको थियो ।
त्यसैगरी आई केयर फाउन्डेसन, कादुरी एग्रिकल्चर एण्ड एसोसिएसन, व्यावसायिक महिला क्लब पोखरा, रोटरी क्लब अफ पोखरा फिस्टेल, मुटु फाउन्डेसन काठमाडौँ, युवा बौद्ध सङ्घ पोखरा, कर्मफ्लाइट्स फाउन्डेशन नेपाल र रिडले आई फाउन्डेसनलाई प्रशंसापत्र प्रदान गरिएको थियो ।
कार्यक्रम अस्पताल व्यवस्थापन समिति अध्यक्ष सुरेन्द्र थापामगरको अध्यक्षतामा सम्पन्न भएको थियो ।
स्वागत मन्तव्य उपाध्यक्ष डा. नन्द श्रेष्ठले राखेका थिए भने सञ्चालन सदस्य डा. नारायण बरालले गरेका थिए ।
३३औँ वार्षिकोत्सवकै अवसरमा नेपाल स्वास्थ्यकर्मी तथा कर्मचारी युनियनको आयोजनामा “रक्तदान जीवनदान, जीवनदान महादान” भन्ने नारासहित खुला रक्तदान कार्यक्रम सम्पन्न गरिएको थियो ।
पोखरा–१७ घारीपाटनस्थित अस्पताल प्राङ्गणमा आयोजित कार्यक्रममा नेपाल रेडक्रस सोसाइटी प्रादेशिक रक्तसञ्चार केन्द्रको प्राविधिक सहयोगमा ४३ युनिट रगत सङ्कलन गरिएको थियो ।
कार्यक्रमका प्रमुख अतिथि प्रा.डा. दिलबहादुर क्षेत्रीले पहिलो रक्तदाता तथा युनियन अध्यक्ष गोविन्दनाथ योगीलाई ब्लड ब्याग हस्तान्तरण गर्दै कार्यक्रम उद्घाटन गर्नु भएको थियो ।
