हेटौँडा । वैदेशिक रोजगारीका लागि विदेश पुगेका मकवानपुरका तीन युवा अहिले आफ्नै गाउँमा उद्यमी बनेका छन् ।
बकैया गाउँपालिका-३, हात्तीसुँडेका सूर्य लामा, सन्देश मोक्तान र गगनराज लुङ्बाले विदेशबाट फर्किएपछि संयुक्त लगानीमा ‘बकैया मिनी साबुन उद्योग’ सञ्चालनमा ल्याउनुभएको हो ।
‘स्थानीय उत्पादन, हाम्रो पहिचान’ भन्ने अवधारणाका साथ स्थापना गरिएको उद्योगले ‘बकैया साबुन’ उत्पादन तथा वितरण सुरु गरेको पत्रकार प्रकाश थिङ तामाङले जानकारी दिनुभएको छ ।
उद्योग सञ्चालनमा आएपछि हालसम्म १० जनाभन्दा बढी स्थानीयले प्रत्यक्ष रोजगारी पाएको सञ्चालकहरूले जानकारी दिएका छन् । उद्योग सञ्चालनमा आएपछि गाउँमै रोजगारी सिर्जना भएको छ ।
विदेशमा रोजगारी गरेर कमाएको अनुभव र सीपलाई आफ्नै गाउँमा प्रयोग गर्ने उद्देश्यले उद्योग स्थापना गरिएको सञ्चालकहरूको भनाइ छ ।
विदेशमा रोजगारी खोज्न बाध्य युवाहरू स्वदेश फर्किएर आफैँ रोजगारी सिर्जना गर्न सक्छन् भन्ने सन्देश दिने उद्देश्यसमेत उद्योगको रहेको उनीहरू बताउँछन् ।
तीन युवाको यो पहलले रोजगारीका लागि विदेशिनुपर्ने बाध्यताबिच स्वदेशमै उद्यम गर्न सकिने सम्भावना देखाएको छ ।
स्थानीय श्रम, स्रोत र सीपलाई उत्पादनसँग जोडेर गाउँमै रोजगारी सिर्जना गर्न सकिने उदाहरणका रूपमा उद्योगलाई स्थानीयले समेत लिएका छन् ।
उद्योगले उत्पादन गरेको साबुनको नाम ‘बकैया साबुन’ राखिएको छ । गाउँपालिकाको नामलाई उत्पादनसँग जोडेर स्थानीय पहिचानलाई बजारसम्म पुर्याउने प्रयास गरिएको सञ्चालकहरूको भनाइ छ ।
उद्योग व्यवसाय सञ्चालनमा सीमित नरही स्थानीय उत्पादनको प्रवर्धन, रोजगारी सिर्जना र गाउँको पहिचान निर्माण गर्ने अभियानका रूपमा अघि बढाइएको उनीहरू बताउँछन् ।
उद्योगमा स्थानीय युवायुवती तथा अन्य श्रमिकले काम पाएका छन् । रोजगारीका लागि बाहिर जानुपर्ने अवस्थाबिच गाउँमै रोजगारीको अवसर सिर्जना भएपछि स्थानीय स्तरमा सकारात्मक प्रभाव परेको छ ।
उद्योग उद्घाटन समारोहमा मकवानपुर क्षेत्र नं. १ का प्रतिनिधिसभा सांसद प्रकाश गौतम, बकैया गाउँपालिका अध्यक्ष धर्मराज लामिछाने, बागमती गाउँपालिका, मकवानपुरका अध्यक्ष सर्केश घलान, बागमती गाउँपालिका, ललितपुरका अध्यक्ष वीरबहादुर लोप्चन, बकैया गाउँपालिकाका विभिन्न वडाका जनप्रतिनिधि तथा स्थानीयवासीको उपस्थिति रहेको थियो ।
समारोहलाई सम्बोधन गर्दै गौतमले भूमिहीन तथा अव्यवस्थित बसोबासीलाई आगामी निर्वाचनअघि नै लालपुर्जा उपलब्ध गराउने विषयलाई प्राथमिकतामा राखिएको बताउनुभयो ।
उहाँले आगामी निर्वाचनमा आफू यही एजेन्डा लिएर जनतामाझ आएमा आफूलाई ‘लखेट्न’समेत आग्रह गर्नुभयो ।
स्थानीय उत्पादन र उद्यमशीलताको विकासबाट गाउँमै रोजगारी सिर्जना गर्न सकिने उल्लेख गर्दै गौतमले युवाहरूको सिर्जनशील प्रयासलाई राज्य र समुदाय दुवै पक्षले प्रोत्साहन गर्नुपर्नेमा जोड दिनुभयो ।
सूर्य लामा, सन्देश मोक्तान र गगनराज लुङ्बाको यो कामले विदेशमा श्रम बेच्न गएका युवाहरू स्वदेश फर्किएर आफ्नै ठाउँमा लगानी, श्रम र सीप प्रयोग गर्दै अरूका लागि समेत रोजगारी सिर्जना गर्न सक्छन् भन्ने उदाहरण प्रस्तुत गरेको छ ।
उद्योगका सञ्चालकहरूका लागि विदेशमा कमाएको अनुभव आफ्नै गाउँमा प्रयोग गर्ने अवसर बनेको छ भने स्थानीयका लागि गाउँमै रोजगारी पाउने आधार बनेको छ ।
‘बकैया साबुन’ अहिले एउटा उत्पादनको नाम मात्र होइन, विदेशबाट फर्किएका युवाले चाहेमा आफ्नै गाउँमा सम्भावना खोज्न सक्छन् भन्ने सन्देशको नाम पनि बनेको छ ।
तीन युवाले सुरु गरेको यो प्रयास विस्तार हुँदै गए स्थानीय उत्पादनको बजार बढ्ने, थप रोजगारी सिर्जना हुने र वैदेशिक रोजगारीबाट फर्किएका अन्य युवालाई समेत स्वदेशमै उद्यम गर्न प्रेरणा मिल्ने अपेक्षा गरिएको छ ।
विदेशमा रोजगारी खोज्दै भौँतारिएका युवाहरूको लामो सूची भएको नेपालमा बकैयाका यी तीन युवाको प्रयासले एउटा महत्वपूर्ण प्रश्न उठाएको छ-रोजगारीका लागि विदेश जानैपर्छ कि आफ्नै गाउँमा अवसर सिर्जना गर्न सकिन्छ ?
बकैया साबुन उद्योग यो प्रश्नको एउटा सम्भावित उत्तर बनेर अगाडि आएको छ ।
