काठमाडौँ । पछिल्लो एक साताभित्र आत्मदाहको प्रयास गरेका तीन जनाको उपचारकै क्रममा मृत्यु भएपछि नेपालमा जलनका बिरामीको उपचार प्रणाली र विशेषज्ञ जनशक्तिको अभाव फेरि बहसको विषय बनेको छ ।
काठमाडौँको बुद्धनगरका ४५ वर्षीय आश्विन राउत, मुगुका २५ वर्षीय गणेश नेपाली र सर्लाहीका २५ वर्षीय विवेक मण्डलको उपचारका क्रममा क्रमशः वीर अस्पताल र कीर्तिपुरस्थित बर्न अस्पतालमा मृत्यु भएको हो ।
तीन ओटै घटनाले गम्भीर जलन भएका बिरामीको उपचार चुनौतीपूर्ण रहेको मात्र होइन, आत्मदाहजस्ता घटनाको सामाजिक र मानसिक पक्षलाई समेत उजागर गरेको छ ।
राउतले आफ्नै घरको भान्सामा आत्मदाहको प्रयास गर्नुभएको थियो । उहाँको शरीरको ५० प्रतिशतभन्दा बढी भाग जलेको थियो र सघन उपचारका बाबजुद २०८३ असार २७ गते मृत्यु भयो ।
पठाओ राइडर गणेश नेपालीले पार्किङ तथा पार्किङ शुल्कको विषयलाई लिएर राहदानी विभाग अगाडि पेट्रोल छर्केर आत्मदाहको प्रयास गर्नुभएको थियो । उहाँको पनि उपचारकै क्रममा २०८३ असार २६ गते वीर अस्पतालमा मृत्यु भएको हो ।
सर्लाहीका विवेक मण्डलले आत्मदाहको प्रयास गरेपछि हेलिकोप्टरमार्फत काठमाडौँ ल्याएर उपचार गरिए पनि २०८३ असार ३० गते उहाँको मृत्यु भयो ।
स्वास्थ्य सेवा विभाग अन्तर्गत व्यवस्थापन महाशाखाको एकीकृत स्वास्थ्य सूचना व्यवस्थापन शाखाको पछिल्लो तथ्याङ्कअनुसार देशभरका स्वास्थ्य संस्थामा ३७ हजार ४ सय ३८ जना जलनका बिरामी उपचारका लागि पुगेका छन् ।
तर, जलन उपचारका लागि आवश्यक विशेषज्ञ चिकित्सक र पूर्वाधारको अभाव अझै गम्भीर रहेको विवरणहरू सार्वजनिक भइरहेका छन् ।
पछिल्ला घटनाले आत्मदाह प्रयासलाई केवल व्यक्तिगत घटना मात्र नभई मानसिक स्वास्थ्य, सामाजिक सुरक्षा र स्वास्थ्य प्रणालीसँग जोडिएको राष्ट्रिय चुनौतीका रूपमा हेर्नुपर्ने सङ्केत गरेका छन् ।
