सिन्धुली । रसुवाको भोटेकोशीमा भदौ १० गते आएको बाढीबाट प्रभावित परिवारका सदस्यलाई सिन्धुली गुरुकुल कलेज तथा सिद्धबाबा प्लस टुले शैक्षिक तथा आर्थिक सहयोग गर्ने भएको छ ।
कलेजले विपद्बाट प्रभावित परिवारका दुई जना सदस्यलाई कक्षा ११ र १२ मा पूर्ण छात्रवृत्ति प्रदान गर्ने घोषणा गरेको हो ।
विपद्का कारण विद्यार्थीको अध्ययनमा अवरोध नआओस् र पीडित परिवारमाथिको शैक्षिक आर्थिक भार कम होस् भन्ने उद्देश्यले छात्रवृत्ति प्रदान गर्ने निर्णय गरिएको कलेज व्यवस्थापनले जनाएको छ ।
छात्रवृत्तिअन्तर्गत छनोट भएका दुई विद्यार्थीले कक्षा ११ र १२ मा कलेजलाई कुनै शुल्क नतिरी अध्ययन गर्न पाउनेछन् ।
शैक्षिक सहयोगसँगै कलेजले विपद् प्रभावित क्षेत्रमा राहत तथा पुनःस्थापनाका लागि आर्थिक सहयोगसमेत गरेको छ ।
कलेजका तर्फबाट जिल्ला प्रशासन कार्यालय, सिन्धुलीमार्फत ‘प्रधानमन्त्री दैवी प्रकोप उद्धार कोष’मा जम्मा गर्ने गरी २५ हजार रुपियाँ प्रमुख जिल्ला अधिकारी स्किम श्रेष्ठलाई हस्तान्तरण गरिएको कलेजले जनाएको छ ।
विपद् प्रभावित क्षेत्रमा राहत तथा पुनःस्थापनाका लागि सहयोग पुगोस् भन्ने उद्देश्यले उक्त रकम प्रदान गरिएको हो ।
सहयोग हस्तान्तरणपछि कलेजका निर्देशक राहुल सिंहले सामाजिक सञ्जालमार्फत तस्बिर सार्वजनिक गर्दै विपद्को समयमा मानवीय सहयोगको आवश्यकता औँल्याउनुभएको छ ।
उहाँले ‘मानवता नै सबैभन्दा ठूलो धर्म हो र सङ्कटको घडीमा एकअर्कालाई साथ दिनु नै हाम्रो मुख्य दायित्व हो’ भन्दै विपद्को कठिन परिस्थितिमा सबै नागरिक तथा सङ्घसंस्थालाई आआफ्नो ठाउँबाट सक्दो सहयोग गर्न आह्वान गर्नुभएको छ ।
सङ्कटको समयमा सामाजिक उत्तरदायित्व वहन गर्दै कलेजले गरेको शैक्षिक तथा आर्थिक सहयोगको स्थानीय स्तरमा प्रशंसा भइरहेको कमलामाइ नगरपालिकाका पूर्व प्रमुख खड्ग खत्रीले जानकारी दिनुभएको छ ।
