काठमाडौँ । सर्वोच्च अदालतकी वरिष्ठतम न्यायाधीश सपना प्रधान मल्ल कामु प्रधानन्यायाधीश बन्नु भएको छ ।
प्रधानन्यायाधीश प्रकाशमान सिंह राउत ६५ वर्षे उमेरहदका कारण २०८२ चैत १७ गते अवकाश भएपछि मल्लले स्वतः उक्त जिम्मेवारी सम्हाल्नु भएको हो ।
नेपालको संविधानको धारा १२९(९) अनुसार प्रधानन्यायाधीशको पद रिक्त भएमा सर्वोच्च अदालतका वरिष्ठतम न्यायाधीशले कामु प्रधानन्यायाधीशको जिम्मेवारी लिने व्यवस्था छ ।
यसैबिच नयाँ प्रधानन्यायाधीश नियुक्तिको प्रक्रिया भने अझै अघि बढ्न सकेको छैन । संवैधानिक परिषद अपूर्ण रहेकाले सिफारिस प्रक्रिया रोकिएको हो । परिषदले यसअघि मल्लसहित ६ न्यायाधीशको नाम सूचीमा राखेको थियो ।
संविधान अनुसार प्रधानन्यायाधीश नियुक्तिका लागि संवैधानिक परिषदको सिफारिस, संसदीय सुनुवाइ र राष्ट्रपतिबाट नियुक्ति आवश्यक पर्छ । यी सबै प्रक्रिया पूरा हुन अझै समय लाग्ने देखिएको छ ।
सपना प्रधान मल्ल लामो समयदेखि कानुन, मानवअधिकार र लैङ्गिक न्यायका क्षेत्रमा सक्रिय रहँदै वकालत पेसाबाट सर्वोच्चमा प्रवेश गर्नु भएको हो । उहाँ सर्वोच्च अदालतमा झण्डै एक दशकदेखि कार्यरत हुनुहुन्छ ।
