सिन्धुली । दुधौली नगरपालिकाका दुई जनाको रसुवाको भोटेकोशीमा आएको बाढीमा परी बेपत्ता भएको लामो समयसम्म अवस्था पत्ता लाग्न नसकेपछि परिवारले कुशको शव बनाएर अन्त्येष्टि गरेका छन् ।
२०८३ भदौ १० गते भोटेकोशीमा आएको अप्रत्याशित बाढीमा परी बेपत्ता भएका दुधौली नगरपालिका-१ का हरि कार्की र वडा नं. २ का लालबहादुर पुलामीको परिवारले असोज ४ गते धार्मिक तथा सांस्कृतिक परम्पराअनुसार कुशको शव बनाएर दुधौलीस्थित कमला नदीमा अन्त्येष्टि गरेका हुन् ।
बाढी आएको लामो समयसम्म आफन्तजनले जीवितै भेटिने आशामा खोजी जारी राखेका थिए । तर, रसुवा, नुवाकोटलगायतका क्षेत्रमा खोजी गर्दा पनि उनीहरूको अवस्था पत्ता लाग्न नसकेपछि परिवारले अन्ततः कुशको शव बनाएर अन्तिम संस्कार गरेका हुन् ।
दुधौली नगरपालिका-४ का वडाध्यक्ष रितबहादुर विश्वकर्मासहित वडा जनप्रतिनिधि, आफन्त र स्थानीयवासीले रसुवा र नुवाकोटसम्म पुगेर बेपत्ताको खोजी गरेका थिए ।
लामो समयसम्म खोजी गर्दा पनि उनीहरूको अवस्था पत्ता लाग्न नसकेको वडाध्यक्ष विश्वकर्माले बताउनुभयो ।
भोटेकोशी बाढीमा दुधौली नगरपालिका क्षेत्रबाट पाँच जना प्रभावित भएका थिए । तीमध्ये एक जना सकुशल उद्धार भएर सम्पर्कमा आएका छन् भने चार जनाको अवस्था अझै अज्ञात रहेको छ ।
बेपत्ता चार जनामध्ये हरि कार्की र लालबहादुर पुलामीको परिवारले कुशको शव बनाएर अन्त्येष्टि गरेका हुन् । बाँकी दुई जनाको खोजी भने अझै जारी रहेको छ । उनीहरूका परिवारले आफ्ना आफन्त सकुशल भेटिने आशा अझै नछाडेको बताएका छन् ।
भदौ १० गते भोटेकोशीमा आएको बाढी तथा पहिरोले रसुवा, नुवाकोटलगायतका क्षेत्रमा ठूलो जनधनको क्षति पुर्याएको थियो ।
बाढी तथा पहिरोमा परी विभिन्न स्थानमा बेपत्ता भएकाहरूको खोजी तथा उद्धारका प्रयास जारी रहे पनि कतिपयको अवस्था अझै अज्ञात रहेको छ ।
लामो समयसम्म आफ्ना प्रियजन फर्किने आशामा बसेका परिवारका लागि खोजीको प्रयास निराशामा परिणत भएपछि कतिपयले धार्मिक परम्पराअनुसार कुशको शव बनाएर अन्तिम संस्कार गर्नुपर्ने अवस्था आएको हो ।
