उक्त निर्णय प्रेस तथा अभिव्यक्ति स्वतन्त्रता, नेपालको संवैधानिक व्यवस्था, खुला अर्थनीति तथा संघीयताको मर्मविपरीत रहेको ठहर गर्दै महासङ्घले आज प्रमुख जिल्ला अधिकारीमार्फत प्रधानमन्त्रीलाई ज्ञापनपत्र बुझाएको हो ।

महासङ्घले सरकारी विज्ञापन वितरणमा गरिएको विभेदकारी नीति सच्याउन माग गरिएको छ ।

निजी तथा स्वतन्त्र सञ्चारमाध्यमहरूलाई उपेक्षा गर्दै सरकारी सञ्चारमाध्यमलाई मात्र प्राथमिकता दिनु प्रतिस्पर्धा र समान अवसरको सिद्धान्तविपरीत भएको महासङ्घको भनाइ छ ।

ज्ञापनपत्रमा यस्तो निर्णयले स्वतन्त्र पत्रकारिता कमजोर बनाउने, सूचना प्रवाहमा असन्तुलन ल्याउने तथा लोकतान्त्रिक मूल्यमान्यतामा असर पर्ने उल्लेख गरिएको छ ।

सरकारलाई उक्त परिपत्र तत्काल खारेज गरी सबै सञ्चारमाध्यमलाई समान रूपमा विज्ञापन वितरण गर्ने नीति अपनाउन आग्रह गरिएको छ ।

महासङ्घ ललितपुरका अध्यक्ष रामहरी कार्कीलगायतका प्रतिनिधिहरूले प्रेस स्वतन्त्रता सुनिश्चित गर्न सरकार गम्भीर हुनुपर्नेमा जोड दिएका छन् ।

उनीहरूले सञ्चार क्षेत्रलाई नियन्त्रण गर्ने प्रयास लोकतन्त्रका लागि घातक हुने चेतावनी समेत दिएका छन् ।

प्रमुख जिल्ला अधिकारीमार्फत बुझाइएको ज्ञापनपत्रमा सरकारबाट छिटो सकारात्मक पहल हुने अपेक्षा गरिएको महासङ्घले जनाएको छ ।

The post पत्रकार महासङ्घ ललितपुरद्वारा सिडिओमार्फत ज्ञापनपत्र appeared first on मानव आवाज.

विद्यालयका प्रधानाध्यापक नवराज महतले शिक्षा तथा मानव स्रोत विकास केन्द्रको निर्देशन र विद्यालयको शैक्षिक योजनाअनुसार कार्यक्रम आयोजना गरिएको जानकारी दिनुभयो ।

कार्यशालाको पहिलो दिन पाठ्यक्रम, पाठ्यसामग्री र विद्यार्थी मूल्याङ्कन विषयमा महेन्द्र विष्टले सहजीकरण गर्नुभयो ।

त्यसैगरी, शैक्षिक योजना व्यवस्थापन र नेतृत्व विकासबारे नवराज सञ्जेलले प्रस्तुति दिनुभयो भने कक्षा व्यवस्थापन र सिकाइ प्रक्रियाबारे माधवप्रसाद अधिकारीले सहजीकरण गर्नुभयो ।

सहभागी शिक्षकहरूले कार्यशालाले पेशागत दक्षता अभिवृद्धि, कार्यप्रेरणा र नेतृत्व विकासमा टेवा पुगेको बताएका छन् ।

दुईदिने कार्यशालाको दोस्रो दिन कक्षाकोठामा अङ्ग्रेजी वातावरण निर्माणबारे प्रेमप्रकाश भट्टराई, शिक्षण सिकाइमा प्रविधि प्रयोगबारे टिकाराम गौतम र हस्तलेखन सुधारसम्बन्धी विषयमा यानी धितालले सहजीकरण गर्ने कार्यक्रम रहेको प्रधानाध्यापक महतले जानकारी दिनुभयो ।

The post कञ्चन माविमा शिक्षकको पेशागत विकास कार्यशाला appeared first on मानव आवाज.

लबग्रीन नेपाल र चौतारी जापानको पहलमा, एल्साराइन जापानका प्रतिनिधिहरूको आर्थिक सहयोग तथा बागमती गाउँपालिकाको सहकार्यमा निर्माण गरिएको ईलाइब्रेरी भवन विद्यालयलाई औपचारिक रूपमा हस्तान्तरण गरिएको हो।

करिब २४ लाख रुपियाँको लागतमा निर्माण गरिएको उक्त परियोजनाअन्तर्गत विद्यालयमा आधुनिक सुविधासहितको ईलाइब्रेरी स्थापना गरिएको छ ।

यसअन्तर्गत आठ सेट कम्प्युटर, ईचौतारी सर्भर, ब्याकअप प्रणाली, खेलकुद सामग्री तथा विभिन्न शैक्षिक सामग्रीहरू उपलब्ध गराइएको जानकारी दिइएको छ।

कार्यक्रममा स्थानीय जनप्रतिनिधि, विद्यालय व्यवस्थापन समिति, शिक्षक, अभिभावक तथा विभिन्न सङ्घसंस्थाका प्रतिनिधिहरूको उपस्थिति रहेको थियो । सहभागीहरूले डिजिटल शिक्षामा पहुँच विस्तार गर्न यस्ता पहल महत्वपूर्ण हुने बताएका छन् ।

ईलाइब्रेरी स्थापना भएसँगै विद्यालयका विद्यार्थीहरूले आधुनिक प्रविधिमार्फत अध्ययनअध्यापनमा थप सहजता पाउने विश्वास गरिएको छ ।

The post बागमती स्कुललाई ईलाइब्रेरी, डिजिटल शिक्षामा पहुँच appeared first on मानव आवाज.

हरेक वर्ष वैशाख शुक्ल पक्ष प्रतिपदाको दिन साइत निकालेर मच्छिन्द्रनाथलाई रथमा विराजमान गराउने परम्पराअनुसार यस वर्ष पनि रथारोहण सम्पन्न गरिएको हो ।

परम्पराअनुसार त:बहालबाट देवताको मूर्तिलाई खटमा राखेर पुल्चोकमा निर्माण गरिएको रथमा पुर्‍याई विधिवत् रूपमा विराजमान गराइएको छ । यससँगै जात्रा औपचारिक रूपमा सुरु भएको मानिन्छ ।

मच्छिन्द्रनाथलाई वर्षको ६ महिना त:बहाल मन्दिर र बाँकी ६ महिना बुङ्गमतीमा राख्ने परम्परा रहेको छ । यसअघि देवतालाई बुङ्गमतीबाट ल्याई पाटनको त:बहालमा स्थापना गरिएको थियो । मच्छिन्द्रनाथको जात्रालाई नेपालकै सबैभन्दा लामो जात्राका नामलेसमेत चिनिन्छ ।

The post रातो मच्छिन्द्रनाथको रथारोहणसँगै जात्रा सुरू appeared first on मानव आवाज.

बृहत् पाशुपत पदयात्राका क्रममा २०८२ वैशाख ३ गते महारुद्रेश्वर पुग्नुभएका गिरीले तपोभूमिका रुपमा रहेको यो क्षेत्रलाई शिवधामका रुपमा विकास गर्नुपर्नेमा जोड दिनुभएको हो ।

काठमाडौं उपत्यका हुँदै विभिन्न जिल्लाहरू समेटिएको ऐतिहासिक तथा आध्यात्मिक पदयात्रा अहिले विशेष आकर्षणको केन्द्र बनेको छ ।

६४ सिद्धज्योतिर्लिङ्गहरूको दर्शन-पूजन गर्ने उद्देश्यसहित अघि बढिरहेको यस यात्रामा सहभागी तीर्थयात्रीहरूले हालसम्म १५ ओटा सिद्धज्योतिर्लिङ्गमा पूजा अर्चना सम्पन्न गरेका छन् ।

१६औँ सिद्धज्योतिर्लिङ्गतर्फ अघि बढ्ने क्रममा टोलीले दक्षप्रजापतिको यज्ञस्थलका रूपमा परिचित तथा महारुद्रेश्वर स्वरूपमा विराजमान भगवान शिवको मन्दिरमा विशेष पूजा सम्पन्न गरेको छ ।

ललितपुरको माझखण्डमा अवस्थित यो मन्दिरमा १००८ स्वामी रमणानन्द गिरीलगायतले पुजाअर्चना गर्नुभएको हो ।

झण्डै १ सय जना भक्तजनहरू सहभागी रहेको यस पदयात्राले धार्मिक आस्था र सांस्कृतिक निरन्तरताको सशक्त सन्देश दिएको छ ।

तीर्थयात्रीहरूले आध्यात्मिक ऊर्जा भरिएको पावन भूमि माझखण्डमा सामूहिक रूपमा पूजा, भजन र आराधना गर्दै वातावरणलाई भक्तिमय बनाएका थिए ।

पूजा सम्पन्न गरेपछि टोली आगामी गन्तव्य नटराम्मेश्वर महादेवतर्फ प्रस्थान गरेको छ । ६४ ओटै धाममा पैदल यात्रा गर्ने यो टोली वैशाख ३ गते बेलुका भट्टेडाँडामा बसेको छ ।

यस यात्राले सिन्धुलीदेखि सुरु भई दोलखा, सिन्धुपाल्चोक, काभ्रेपलाञ्चोक, ललितपुर, मकवानपुर, धादिङ, नुवाकोट, भक्तपुर हुँदै काठमाडौंसम्मका विभिन्न धार्मिक स्थलहरूलाई समेट्दै अघि बढिरहेको छ ।

कुशेश्वर महादेवदेखि रुद्रागारेश्वर महादेवसम्म फैलिएको ६४ सिद्धज्योतिर्लिङ्गहरूको यो श्रृङ्खला हिन्दू धर्मावलम्बीहरूका लागि अत्यन्त महत्वपूर्ण मानिन्छ ।

धार्मिक पर्यटनको प्रवर्धन, सांस्कृतिक सम्पदाको संरक्षण तथा आन्तरिक एकताको सन्देश बोकेको यस पदयात्राले स्थानीय स्तरमा पनि उत्साह थपेको छ ।

विभिन्न स्थानका स्थानीय बासिन्दाले तीर्थयात्रीहरूको स्वागत गर्दै सहयोग पुर्‍याइरहेका छन् भने यसले धार्मिक चेतना अभिवृद्धिमा समेत महत्वपूर्ण भूमिका खेलेको देखिन्छ ।

आयोजकका अनुसार सम्पूर्ण ६४ सिद्धज्योतिर्लिङ्गहरूको दर्शन-पूजन सम्पन्न गरेपछि यात्रा समापन गरिनेछ ।

यस किसिमको लामो धार्मिक पदयात्राले श्रद्धालुहरूमा आत्मिक शान्ति, अनुशासन र समर्पण भाव अभिवृद्धि गराउने विश्वास गरिएको छ ।

१००८ स्वामी रमणानन्द गिरीले यो यात्रालाई धार्मिक आन्दोलनका रुपमा बुझ्न आग्रह गर्नु भएको छ ।

उहाँले भन्नु भयो-‘यो हाम्रो धार्मिक आन्दोलन हो । यो दबाब अभियान हो । सरकारलाई सहकार्यका लागि गरिएको आह्वान हो ।’

राष्ट्रदेव पशुपतिनाथ मन्दिर प्रति श्रद्धा प्रकट गर्दै तथा पाशुपत क्षेत्रको संरक्षण, प्रवर्धन र आध्यात्मिक महत्त्वलाई थप सुदृढ बनाउने उद्देश्यले ‘पाशुपत पदयात्रा’ आयोजना गरिएको छ ।

आयोजकले पञ्चसूत्रीय सङ्कल्पसहित सुरु गरिएको उक्त पदयात्राले धार्मिक, सांस्कृतिक तथा सामाजिक सन्देश प्रवाह गर्ने विश्वास व्यक्त गरेका छन् ।

पदयात्राको प्रमुख उद्देश्यहरूमा शिवापराधको क्षमायाचना, पाशुपत क्षेत्रलाई मानवीय तथा राजनीतिक प्रदूषणबाट मुक्त राख्न राज्यलाई खबरदारी, तथा हिन्दु, बौद्ध र किराँत समुदायको साझा आस्थाको केन्द्रका रूपमा रहेको क्षेत्रलाई आध्यात्मिक समन्वयको प्रतीकका रूपमा विकास गर्ने लक्ष्य समेटिएको छ ।

साथै, मठमन्दिर तथा देवमूर्तिको नित्य पूजाआजा र साधुसन्तहरूको निवास व्यवस्थापनका लागि सम्बन्धित निकायसँग समन्वय र अनुगमन गर्ने योजना पनि अघि सारिएको छ ।

आयोजकका अनुसार पदयात्राका क्रममा ६४ सिद्धज्योतिर्लिङ्गहरूको दर्शनपूजन, बागमती परिक्रमा तथा ‘पशुपति संवाद’ जस्ता कार्यक्रम सञ्चालन गरिनेछ ।

यसले पाशुपत क्षेत्रको महिमा उजागर गर्दै धार्मिक पर्यटन प्रवर्धनमा समेत टेवा पुग्ने अपेक्षा गरिएको छ ।

पदयात्रामा सहभागी पदयात्री तथा तीर्थयात्रीहरूलाई आयोजकले शुभकामना व्यक्त गर्दै यस अभियानले नेपाललाई ‘गुरुराष्ट्र’का रूपमा चिनाउने दिशामा सकारात्मक योगदान पुग्ने विश्वास व्यक्त गरेका छन् ।

The post महारुद्रेश्वरलाई शिवधामका रुपमा विकास गर्नुपर्नेमा जोड appeared first on मानव आवाज.

राष्ट्रिय अभियानका रुपमा सरकारले सुरु गरेको दोश्रो राष्ट्रिय आर्थिक गणना अन्तर्गत देशव्यापी सञ्चालन हुने अभियान ललितपुरमा आजबाट २०८३ असार ७ गतेसम्म सञ्चालन हुने आर्थिक गणना तथ्याङ्क कार्यालय ललितपुरका प्रमुख हरिओम पोखरेलले बताउनुभयो ।

वडाभित्र रहेका विभिन्न आर्थिक केन्द्रहरुमा पुगि इसेन्सस र भौतिक विधिमार्फत आर्थिक तथ्याङ्क सङ्कलन गरी राष्ट्रको वास्तविक आर्थिक अवस्था पत्ता लगाउने अभियान भएकोले सबैले सहयोग गर्न ललितपुर कार्यालयका प्रमुख पोखरेलले आग्रह गर्नुभयो ।

आर्थिक गणनाका गणक तथा सुपरिवेक्षकलाई दिइएको पाँच दिने तालिम समापन गर्दै सम्पूर्ण विकास योजनाका लागि आधारभूत अवस्थाको पहिचानका लागि आवश्यक आर्थिक तथ्याङ्क सङ्कलनको अभियानमा स्थानीय तह, उद्योग वाणिज्य सङ्घ तथा अन्य सरोकारवाला निकायसँग समन्वय गरिएको पनि पोखरेलले बताउनुभयो ।

ललितपुरमा ९८ जना गणक र १३ जना सुपरिवेक्षक गरी १ सय ११ जना फिल्डमा परिचालन हुने पोखरेलले बताउनुभयो ।

जिल्लाका ६ स्थानीय तहका सम्पूर्ण उद्योग व्यवसाय तथा व्यावसायिक प्रतिष्ठानको तथ्याङ्क ल्याउन रियल टाइम डाटा सिष्टम प्रयोग गरी फिल्डको वास्तविक तथ्याङ्क प्राप्त हुने विश्वास पोखरेलले व्यक्त गर्नुभएको छ ।

व्यवसायको क्षेत्रगत र विषयगत अवस्था, तिनमा भएको पुँजी लगानी, ऋणको अवस्था, एनएसआइसी कोड अनुसारका २१ मध्ये १८ क्षेत्रको तथ्याङ्क सङ्कलन हुने पोखरेलले बताउनुभयो ।

पहिलो आर्थिक गणना २०७५ मा भएको र हरेक ५ वर्षमा अद्यावधिक गर्ने भनिए पनि २०८० मा हुन नसकेको र यस आर्थिक गणनाबाट सङ्कलन भएको तथ्याङ्क डिजिटल रुपमा सङ्कलन हुने र इसेन्ससलाई अटो अपडेट हुने गरी व्यवस्थापन मिलाउन समेत सकिने गरी तयार पार्ने तयारी तथ्याङ्क कार्यालयले गरेको पनि पोखरेलले बताउनुभयो ।

आर्थिक गणनाका लागि स्थानीय तह, वडा कार्यालय, तथा अन्य सरकारी निकाय तथा नागरिक समाजका विभिन्न निकायसँग समन्वय भएको पनि राष्ट्रिय आर्थिक गणना ललितपुर कार्यालयका प्रमुख पोखरेलले बताउनुभयो ।

इसेन्ससको लागि २०८३ जेठ मसान्तसम्म र छुटेकालाई २०८३ असार ७ गतेसम्म भौतिक रुपमा समेटेर गणना गरिने गरी व्यवस्था मिलाइएको कार्यालयले जनाएको छ ।

उद्योग व्यवसायको चापका आधारमा एउटै वडालाई एक भन्दा बढी गणना क्षेत्र बनाएर गणना गरिएको र ग्रामीण भेकका गाउँपालिका क्षेत्रमा एक वडामा एक गणक र गणना क्षेत्र बनाएर कार्यविभाजन गरिएको राष्ट्रिय आर्थिक गणना ललितपुर कार्यालयका प्रमुख पोखरेलले बताउनुभयो ।

उहाँले गणक तथा सुपरिवेक्षकहरुलाई रियल टाइम जिआइएस सुपरिवेक्षण सिष्टम प्रयोग गरिएको बताउनुभयो ।

The post ललितपुरका ७१ ओटै वडामै एकसाथ आर्थिक गणना appeared first on मानव आवाज.

हाल गम्भीर स्वास्थ्य समस्याबाट पीडित सौहार्दको त्रिविवि शिक्षण अस्पतालको निगरानीमा नियमित उपचार भइरहेको छ ।

सिर्जनाका अनुसार अप्रेसनका बेला अस्पताल भर्ना हुनुपर्ने भएपनि अहिले नियमित फलोअपमा आउजाउ भइरहेको छ ।

चिकित्सक तथा अस्पतालको सल्लाहअनुसार सौहार्द जन्मजात दुबै कान नसुन्ने (श्रवणशक्ति गुमेको) अवस्थामा रहेको सिर्जनाले बताउनु भयो ।

सुनाइ सक्षम बनाउनका लागि ‘हियरिङ एड’ जडान गर्नुपर्ने चिकित्सकले सुझाव दिएका छन् । उक्त उपचार तथा उपकरण जडानका लागि करिब १२ देखि १४ लाख रुपियाँसम्म खर्च लाग्ने जानकारी प्राप्त भएको छ, जुन रकम जुटाउन परिवारको आर्थिक अवस्था कमजोर भएकोले कठिनाइ भइरहेको छ ।

त्यसैले स्वदेश तथा विदेशमा रहनुभएका सहयोगीहरूमा बालक सौहार्दको जीवनमा आशाको किरण जगाउन सक्दो आर्थिक सहयोग गरिदिनु हुन हार्दिक अपिल गरिएको छ । तपाइँको सानो सहयोगले पनि एउटा बालकको भविष्य उज्यालो बनाउन सक्छ ।

The post पाँच वर्षीय बालकको मौन संसारमा आवाज भर्न सहयोगका लागि भावुक अपिल appeared first on मानव आवाज.

कार्यक्रमा ललितपुर निर्वाचन क्षेत्र नं १ का सांसद बुद्धरत्न महर्जनले दक्षिण ललितपुरको विकासका लागि आफू समुदायसँगसँगै रहने बताउनु भयो ।

उहाँले भन्नु भयो- ‘म ५-६ पटक सबै गाउँ पुगेको छु । यहाँका नागरिकको दुःख र मर्का बुझेको छु । विद्युत् सेवामा परेको मर्काबारे पनि बुझेको छु । त्यसैले समाधान गर्ने काममा म सहकारी सँगसँगै रहने छु ।’

कार्यक्रममा पूर्व जलस्रोत मन्त्री दीपक ज्ञवालीले विद्युत वितरणको काम स्थानीय सरकार र समुदायले गर्नु पर्ने बताउनु भयो ।

कार्यक्रममा सहकारीका संस्थापक अध्यक्ष डिल्लीप्रसाद घिमिरे, पूर्वअध्यक्ष गोपाल सञ्जेल र पूर्वअध्यक्ष रामकृष्ण हुमागाईँले अभियानदेखि अहिलेसम्मका उकालीओरालीबारे अनुभव सुनाउनुभयो ।

कार्यक्रममा संस्थाका अध्यक्ष गोविन्दप्रसाद बजगाइँले विगतको यात्रालाई मूल्याङ्कन गर्दै आगामी दिनमा सामुदायिक विद्युतीकरणलाई अझ सशक्त ढङ्गले अघि बढाउने प्रतिबद्धता व्यक्त गर्नु भयो ।

नेपालकै पहिलो विद्युत सहकारीका रुपमा स्थापित यस संस्थाले सामुदायिक विद्युत सेवाको २१ वर्ष पूरा गरेको छ ।

सहकारीले २०५४ असोज ७ गते सामुदायिक विद्युतीकरण अभियान प्रारम्भ गरेको थियो भने २०५७ साउन १७ गते औपचारिक रुपमा सहकारी स्थापना भई २०६१ भदौ २ गते देवीचौरबाट विद्युत सेवा प्रारम्भ गरेको हो ।

यसैबिच सहकारीले प्रकाशन गरेको सामुदायिक विद्युत्को जीवन्त अभिलेखलाई हाइलाइट गरिएको सामुदायिक विद्युत रजतवर्ष २०८२ स्मारिकाको विमोचन गरिएको छ ।

‘प्राज्ञिक कर्मको प्रतिफल यो सामुदायिक विद्युत् स्मारिका प्रकाशनका हिसाबले छैटौँ शृङ्खला हो । यो शृङ्खला रजतवर्षको सन्दर्भमा प्रकाशन गरिएकाले यसको अर्थ र महत्व पनि छ । यो अङ्कले २५ वर्षको सपाट इतिहास बोकेको छ । यसले २५ वर्ष अघिको अँध्यारो दक्षिण ललितपुरलाई अक्षरका माध्यमबाट सचित्र वर्णन गरेको छ । बिजुली बत्तीको आवश्यकता  र अङ्कुरणबारे बोलेको छ । यो किताब त्यसपछिका दिनमा गरिएका पहल र प्रयासको साक्षी हो । भावी दिनमा गर्नुपर्ने मार्गचित्रसमेत यो किताबले प्रस्तुत गरेको छ ।’-स्मारिकामा भनिएको छ ।

यो स्मारिकाले सामुदायिक विद्युत् र दक्षिण ललितपुरको विविधताबारे प्रष्टसँग बोलेको छ । ३ सय पेजको यो स्मारिका ६ खण्डमा विभाजित छ ।

स्मारिकाको पहिलो खण्डमा विगतको यात्रा समेटिएको छ । यो खण्डमा विद्युत सहकारी बन्नुअघिदेखिका घटनाक्रम र विविरण तथा अभियानका विषयवस्तुलाई समेट्छ । जसमा १० ओटा शीर्षकमा अन्तर्वार्ता तथा लेख समेटिएको छ ।

त्यसैगरी दोस्रो खण्डमा १९ शीर्षकका सामग्री छन् । यो खण्डको नाम विचारविमर्श राखिएको छ । यस खण्डमा विज्ञका विचार र विश्लेषण तथा पत्रकारले लेख्नुभएका फिचर समेटिएको छ ।

तेस्रो खण्डलाई कुराकानी खण्डको नाम दिइएको छ । यो खण्डमा आठ जनासँग गरिएको कुराकानी र दुई ओटा समूहमा गरिएको छलफललाई स्थान दिइएको छ ।

चौथो खण्डमा अुभूति समावेश गरिएको छ । २३ जनाका अनुभूतिलाई यो खण्डमा राखेर प्रकाशन गरिएको छ ।  पाँचौ खण्डमा विद्युत्का विषयमा लेखिएका १० जनाका सिर्जना समावेश छ ।

२५ वर्षे इतिहासलाई देखाउने तस्बिर छैटौँ खण्डमा समावेश गरिएको छ । यो खण्डमा वडागत चित्रण, अभियानदेखि अहिलेसम्मका कार्यसमिति र कर्मचारीका विवरण तथा मुख्य गतिविधिका केही प्रतिनिधिमूलक तस्बिर छन् ।

त्यसैगरी छापा सामुदायिक विद्युत्को सङ्कलन र सहकारीले निर्माण गरेको कक्ष १ देखि कक्षा ५ सम्मका पाठ्यक्रम र पाठ्यपुस्तकका कभर फोटो राखिएको छ ।

यो स्मारिकामा चार ओटा सामग्री तामाङ भाषामा राखिएको छ । बिजुलीले यहाँको समुदायमा पारेको बहुआयामिक प्रभावबारे स्मारिकाले बोलेको छ ।

The post विद्युत् सहकारीको रजतवर्ष कार्यक्रममा स्मारिका विमोचन, बिजुलीबारे चर्चा appeared first on मानव आवाज.

स्थानीय टोल सुधार समिति, महिला समूह तथा विभिन्न संघसंस्थाहरूको संयुक्त पहलमा सञ्चालन हुन लागेको यस महायज्ञ आगामी चैत्र २६ गतेदेखि प्रारम्भ भई वैशाख ३ गतेसम्म सञ्चालन हुनेछ ।

आयोजकका अनुसार बढ्दो शहरी व्यस्तता र परिवारबाट दिनभर आवश्यक हेरचाह नपाइरहेका ज्येष्ठ नागरिकहरूको सेवा तथा संरक्षणका लागि यस्तो धार्मिक अभियान अघि बढाइएको हो ।

अनुष्ठानमार्फत संकलित आर्थिक सहयोग ज्येष्ठ नागरिक दिवा सेवा केन्द्र स्थापना तथा सञ्चालनमा खर्च गरिने बताइएको छ ।

२०८२ चैत २४ गते आयोजित पत्रकार सम्मेलनमार्फत सार्वजनिक गरिएको कार्यक्रमअनुसार अनुष्ठान धापाखेलस्थित वडा कार्यालय परिसरमा सञ्चालन हुनेछ ।

अनुष्ठानमा प्रसिद्ध कथाव्यास आचार्य ओमप्रकाश सुवेदीद्वारा श्रीमद्भागवत कथा वाचन गरिनेछ भने मुमुक्षु उद्धव शर्मा हुमागाईं सङ्कल्पकर्ताका रूपमा रहनुहुनेछ ।

कार्यक्रमअन्तर्गत प्रत्येक दिन बिहान ७ बजे पूजा, ८ बजेदेखि पाठपारायण तथा ११ बजेदेखि साँझ ६ बजेसम्म कथा वाचन हुनेछ ।

साथै दैनिक रूपमा दिव्य झाँकी प्रदर्शन र भक्ति संगीत प्रस्तुत गरिने संयोजक देवकी शर्माले जानकारी दिनुभयो ।

अनुष्ठानको पहिलो दिन भव्य कलश यात्रा निकालिनेछ भने समापनका दिन लक्ष्यदीप प्रज्वलन, सामूहिक व्रतबन्ध, विवाह, ग्रहशान्ति, तुलादान तथा १००८ शालिग्राम पूजाअर्चना जस्ता विविध धार्मिक कार्यक्रम आयोजना गरिनेछन् ।

सङ्कल्पकर्ता हुमागाईंले श्रीमद्भागवत लगायतका पुराण श्रवणले आत्मिक शान्ति, आन्तरिक सन्तुलन तथा जीवनमा सकारात्मक ऊर्जा प्रदान गर्ने विश्वास व्यक्त गर्दै सम्पूर्ण श्रद्धालु भक्तजनलाई कार्यक्रममा सहभागी हुन आग्रह गर्नुभएको छ ।

वडा नं. २३ का अध्यक्ष जीवन महर्जनले पनि वडावासी तथा सम्पूर्ण श्रद्धालुहरूलाई महायज्ञ सफल बनाउन सहयोग गर्न आह्वान गर्दै यसले धापाखेल क्षेत्रको धार्मिक तथा सामाजिक पहिचान विस्तारमा महत्वपूर्ण योगदान पुर्‍याउने विश्वास व्यक्त गर्नुभयो ।

The post धापाखेलमा श्रीमद्भागवत सप्ताह, ज्येष्ठ नागरिक सेवा केन्द्र निर्माण गरिने appeared first on मानव आवाज.

“जिम्मेवार अभिभावक, जिम्मेवार विद्यालय” भन्ने मूल नाराका साथ विद्यालयले सामाजिक उत्तरदायित्व अन्तर्गत कार्यक्रम आयोजना गरेको हो ।

शिक्षा विकास निर्देशनालय, हेटौँडाको सहकार्यमा आयोजित कार्यक्रममा गोदावरी नगरपालिकाका प्रमुख प्रशासकीय अधिकृत उपसचिव मानबहादुर खड्काले प्रमुख सहजीकरण गर्नुभयो ।

उहाँले अभिभावकको भूमिका, विद्यालयप्रतिको जिम्मेवारी तथा बालबालिकालाई प्रदान गर्नुपर्ने नैतिक शिक्षाबारे प्रकाश पार्नुभयो ।

कार्यक्रममा विद्यालयका प्रधानाध्यापक गोपालकुमार पाण्डेको अध्यक्षता रहेको थियो । उहाँले विद्यालयलाई उत्तरदायी र व्यवहारिक शिक्षामुखी बनाउन निरन्तर प्रयास भइरहेको बताउनुभयो ।

करिब १ सय ५० जना अभिभावकको सहभागिता रहेको कार्यक्रममा अभिभावकहरूले आफ्ना सन्तान असल नागरिक बनेको हेर्न चाहेको धारणा व्यक्त गरेका थिए ।

कार्यक्रमलाई अझ प्रभावकारी र बहुउपयोगी बनाउने उद्देश्यले आगामी योजना तयार भइरहेको विद्यालयका शैक्षिक योजना संयोजक तथा कार्यक्रम संयोजक नवराज सञ्जेलले जानकारी दिनुभयो ।

The post फूल्चोकी माविमा अभिभावक शिक्षा कार्यक्रम सम्पन्न appeared first on मानव आवाज.