यतिखेर वैशाखको चर्को घामले जमीन तातेको छ । घामबाट जोगिने छहारी कतै छैन । छाता ओढेर ग्राहकको प्रतीक्षामा बसिरहेका छन्-ढाटिमाया दर्जी, सुकुमाया थिङ र फूलमाया वाइवा । छाताले टाउको त ढाकेको छ, तर जीवनका सङ्घर्षहरू ढाकिएका छैनन् । फागुन-चैतको आँधी होस्, वैशाख-जेठको तातो घाम वा असार-साउनको झरी-यी महिलाहरू दैनिक हाट र फुटपाथमा जीवनसँग जुधिरहेका हुन्छन् ।

७१ वर्षीया ढाटिमाया दर्जीको व्यापारिक यात्रा झन्डै तीन दशक लामो छ । २८ वर्षअघि ३५ रुपियाँको सानो लगानीबाट सुरु भएको उहाँको व्यवसायिक यात्रा आज करिब ३५ हजार रुपियाँसम्म आइपुगेको छ । “किसानसँग दुई रुपियाँमा किनेको फापरको साग पाँच रुपियाँमा बेच्दा पहिलोपटक नाफा कमाएँ ।” उहाँ विगत सम्झनुहुन्छ-“त्यही सानो सुरुवातले आजसम्म धानेको छ ।”

पहिले सिन्धुलीसँगै रामेछाप र दोलखाका हाट-मेलामा पुग्ने उहाँ अहिले पनि सदरमुकाम सिन्धुलीमाढीको शनिबारे हाटमा नियमित रूपमा व्यापार गर्नुहुन्छ । साग, अदुवा, बेसार, केरा, खुर्सानीदेखि गुन्द्रुकसम्म-गाउँमै उत्पादन भएका सामानहरू उहाँको थलोमा सजिएका हुन्छन् ।

“आफ्नै पौरखमा बाँचेकी छु ।” उहाँ भन्नुहुन्छ- “आजसम्म कसैसँग हात फैलाउनु परेको छैन ।” तर, आज आमाको मुख हेर्ने दिनमा पनि उहाँका आँखामा सन्तानको प्रतीक्षा छ । आठ सन्तानमध्ये धेरैलाई गुमाइसक्नुभएकी उहाँसँग बाँचेका दुई छोराको पनि साथ छैन । घामको तापभन्दा बढी उहाँलाई सन्तानको सम्झनाले पोल्छ ।

ढाटिमायाकै सहयात्री हुनुहुन्छ ८० वर्ष पार गरिसकेकी सुकुमाया थिङ । ३५ वर्षदेखि हाटहाटमा घुमेर व्यापार गर्दै आउनुभएकी उहाँ भन्नुहुन्छ-“आफ्नो गोडामा उभिएपछि कसैले हेप्न सक्दैन । शरीरले साथ दिएसम्म मिहेनत गरिरहन्छु ।” भिमानदेखि सिन्धुलीमाढी हुँदै दोलखासम्मका हाटमा पुग्नुभएकी उहाँ अझै पनि सक्रिय हुनुहुन्छ । सानो लगानीमै पनि जीवन धान्न सकिन्छ भन्ने उहाँको अनुभवले सिकाएको पाठ हो ।

७२ वर्षीया फूलमाया वाइवाको जीवन पनि उस्तै सङ्घर्षले भरिएको छ । ३१ वर्षदेखि शनिबारे हाटमा व्यापार गर्दै आउनुभएकी उहाँ गाउँका अर्गानिक उत्पादन बेच्दै जीविका चलाउनुहुन्छ । “छोरा सेनामा जागिरे छ । तर मैले उसलाई दुःख दिएकी छैन ।”-उहाँ भन्नुहुन्छ-“आफ्नै कमाइले बाँचेकी छु । काम गर्दागर्दै मर्न पाए पुग्छ ।” बजारमा महङ्गी बढ्दा उहाँलाई चिन्ता लाग्छ, तर हिम्मत भने टुटेको छैन ।

हाट मात्रै होइन, सिन्धुलीमाढीका फुटपाथहरू पनि यस्तै सङ्घर्षका कथाले भरिएका छन् । ६० वर्षीया सावित्री थापाले चार वर्षदेखि फुटपाथमा व्यापार गर्दै आउनुभएको छ । बिहान ९ बजेदेखि साँझ ७ बजेसम्म उहाँ खुर्सानी, अण्डा, केरा र जडीबुटी बेच्दै बस्नुहुन्छ । बिरामी छोराको जिम्मेवारीले उहाँलाई यो बाटोमा ल्यायो । “दैनिक चार सयदेखि हजार रुपियाँसम्म हुन्छ ।”-उहाँ भन्नुहुन्छ- “त्यहीले घर चलेको छ ।” ८० वर्षीया देवकुमारी भुजेल पनि फुटपाथमै सङ्घर्षरत हुनुहुन्छ । सामाजिक सुरक्षा भत्ताले औषधि नपुगेपछि उहाँ अझै काम गर्न बाध्य हुनुहुन्छ । सन्तानको उपेक्षाले उहाँ एक्लै कोठा भाडामा बसेर जीवन धानिरहनुभएको छ ।

अनितादेवी रामको कथा अझ पीडादायी छ । पतिको निधनपछि तीन सन्तानको जिम्मेवारी उहाँको काँधमा आयो । जुत्ताचप्पल सिलाउने काम उहाँले बाध्यताले सिक्नुभयो । “पहिला घरधन्दामै सीमित थिएँ ।”-उहाँ भन्नुभुन्छ-“छोराबाट सिकेर यो काम थालेँ ।” आज उहाँ बिहान घरधन्दा सकेर फुटपाथमा बस्नुहुन्छ । दिनभरि जुत्ता सिलाउँदा औँला छेडिन्छन्, पाखुरा दुख्छ । “दुःखको काम हो, तर नगरी हुँदैन ।”-उहाँ भन्नुभुन्छ । महिला भएकै कारण ग्राहक कम आउने गुनासो पनि छ । “कतिपयले ‘यो काम पुरुषले गर्ने हो’ भनेर हेला गर्छन् ।”-उहाँ सम्झनुहुन्छ । तैपनि, उहाँले हार मान्नुभएको छैन । छोराछोरीलाई पढाउँदै, पसिना बगाउँदै उहाँ अघि बढिरहनुभएको छ ।

फुटपाथका साना व्यापारीहरूलाई बेलाबेलामा नगर प्रहरीले हटाउँछ । स्थायी व्यवस्थापन नहुँदा उहाँहरू झन् समस्यामा पर्नुहुन्छ । स्थानीय तहले प्रयास गरेको दाबी गरे पनि समस्या ज्यूँका त्यूँ छ । तर, यी महिलाहरूमा गुनासोभन्दा बढी आत्मसम्मान छ । थोरै विस्मात आफ्नो भाग्यसँग भए पनि उहाँहरू कसैलाई दोष दिनुहुन्न । चर्को घाममा पसिना बगाउँदै उहाँहरू एउटा विश्वास बोकेर बस्नुभएको छ-आजको सङ्घर्षले भोलिको जीवन केही सजिलो बनाउनेछ ।

The post चर्को घाममा जीवनसँग जुध्दै सिन्धुलीका पौरखी महिलाहरू appeared first on मानव आवाज.

सिन्धुली जिल्लामा पहिलो पटक मरिण गाउँपालिका-६ भुताहाका किसानहरूले मकैको ‘रामपुर हाईब्रिड-१०’ (वर्णशङ्कर) जातको बिउ उत्पादन सुरु गरेका छन् ।

वडा नं. ६ का वडाध्यक्ष हर्कवीर माझीका अनुसार यो पहल जिल्लामै नयाँ अभ्यासका रूपमा सुरु गरिएको हो ।

यस वर्ष कृषि विकास कार्यालय सिन्धुलीको सहयोगमा भुताहास्थित कपिलाकोट साना किसान कृषि सहकारी संस्थामा आबद्ध १६ जना किसानहरूले उक्त बिउ उत्पादन थालेका हुन् ।

परीक्षणका रूपमा सुरु गरिएको यो कार्यक्रम सफल बन्दै गएपछि स्थानीय किसानहरू उत्साहित भएका छन् ।

मकैको बिउ उत्पादनबाट राम्रो आम्दानी हुने र थोरै जमिनबाट पनि बढी फाइदा लिन सकिने भएकाले किसानहरू यसतर्फ आकर्षित भएका छन् ।

यस कार्यक्रममा संलग्न किसान अर्जुनबहादुर गुर्मछान मगरले प्राविधिकहरूको निरन्तर सहयोगमा काम गरिरहेको बताउनुभयो । उहाँका अनुसार प्राविधिक सल्लाहअनुसार खेती गर्दा उत्पादन राम्रो हुने अपेक्षा गरिएको छ ।

उत्पादित बिउको बजारीकरणका लागि मुक्तिनाथ कृषि कम्पनीसँग सम्झौता भएको छ । सम्झौताअनुसार घोगासहितको (भाँचेर ३-४ दिन सुकाइएको) बिउ प्रतिकेजी १ सय १५ रुपियाँ र दाना (छडाएको) बिउ प्रतिकेजी १ सय ६० रुपियाँमा खरिद गरिनेछ ।

हाल किसानहरूले करिब १० बिगाहा जमिनमा उक्त जातको मकैको बिउ उत्पादन गरिरहेका छन् । कृषि विकास कार्यालय सिन्धुलीका प्रमुख अनुप अधिकारीका अनुसार यस कार्यक्रमका लागि राष्ट्रिय मकै बाली अनुसन्धान कार्यक्रम, रामपुर चितवन (नार्क) र मरिण गाउँपालिकाको साझेदारी रहेको छ ।

नार्कले किसानहरूलाई भाले र पोथी बिउसहित प्राविधिक सहयोग निःशुल्क उपलब्ध गराएको छ भने कृषि विकास कार्यालयले थप प्राविधिक सहयोग, विषादी, रासायनिक मलको सुनिश्चितता लगायतका सहयोग उपलब्ध गराइरहेको छ ।

कार्यालयले मरिण गाउँपालिकालाई धान तथा मकैको बिउ उत्पादन क्षेत्र घोषणा गरी सोहीअनुसार कार्यक्रम सञ्चालन गरिरहेको जनाएको छ ।

यसैबिच, २०८३ वैशाख १ गते राष्ट्रिय मकै बाली अनुसन्धान कार्यक्रम रामपुर, चितवन तथा बागमती प्रदेश बिउ बिजन गुणस्तर नियन्त्रण केन्द्र, हेटौंडाका प्रमुख तथा वैज्ञानिकहरूको टोलीले भुताहामा स्थलगत अनुगमन तथा निरीक्षण गरेको छ । टोलीले किसानहरूलाई आवश्यक सल्लाह र सुझाव पनि दिएको छ ।

राष्ट्रिय मकै बाली अनुसन्धान कार्यक्रम रामपुर, चितवनका प्रमुख तिर्थराज रिजालका अनुसार गत वर्ष सिन्धुलीकै हरिहरपुरगढी गाउँपालिकामा गरिएको परीक्षण सफल भएपछि मरिण गाउँपालिकामा यो कार्यक्रम विस्तार गरिएको हो ।

उहाँले ‘रामपुर हाईब्रिड-१०’ जातको बिउ अत्यधिक लोकप्रिय रहेको र नेपालका तीन ओटै सिजनमा यसको माग उच्च रहेको बताउनुभयो ।

उहाँका अनुसार यो जातको मकैले बढी तापक्रम पनि सहन सक्छ र विभिन्न सिजनमा उत्पादन गर्न सकिन्छ, जसले मध्य पहाडी क्षेत्रमा यसको उत्पादन राम्रो हुने देखिएको छ ।

बागमती प्रदेश बिउ बिजन गुणस्तर नियन्त्रण केन्द्रका प्रमुख राजन ढकालले प्रारम्भिक परीक्षणको नतिजा उत्साहजनक रहेको बताउनुभयो ।

उहाँले प्राविधिक निगरानीमा गुणस्तरीय बिउ उत्पादन भइरहेको उल्लेख गर्दै यसबाट किसानलाई आर्थिक लाभ हुने र बिउ आयातमा हुने खर्चसमेत घट्ने बताउनुभयो ।

मरिण गाउँपालिकाका अध्यक्ष विमर्श मोक्तानले यस कार्यक्रमले स्थानीय कृषिमा सकारात्मक प्रभाव पारेको बताउनुभयो ।

उहाँले आगामी वर्षहरूमा सिँचाइ, मल तथा बिउ उत्पादनमुखी कार्यक्रमलाई थप सुदृढ गर्दै विशेष गरी विपन्न वर्गलाई लक्षित गरी मकै बिउ उत्पादनलाई प्राथमिकता दिने योजना रहेको जानकारी दिनुभयो ।

The post मरिणमा ‘रामपुर हाईब्रिड–१०’ जातको मकैको बिउ उत्पादन सुरु appeared first on मानव आवाज.

२०८२ चैत २५ गते आयोजित पत्रकार सम्मेलनमा संस्थापक अध्यक्ष विजय पौडेलले चैत २७ गते उक्त प्रतियोगिता आयोजना गरिने जानकारी दिनुभयो ।

उहाँका अनुसार प्रतियोगिता पोखरा महानगरपालिका-५, प्रस्याङस्थित ताजमहल इभेन्ट सेन्टरमा आयोजना हुनेछ। प्रतियोगिता बिहान ७ बजेदेखि सुरु भई राति ९ बजेसम्म चार चरणमा सञ्चालन गरिनेछ ।

च्याम्पियनसिपमा एजुकेसन पार्टनरका रूपमा कान्तिपुर टुरिजम एण्ड होटल म्यानेजमेन्ट कलेज रहेको जानकारी दिइएको छ ।

अध्यक्ष पौडेलका अनुसार प्रतियोगिताले नेपाली बारटेन्डरहरूको कलात्मकता र प्राविधिक दक्षता उजागर गर्नुका साथै व्यावसायिक तालिमलाई अन्तर्राष्ट्रिय रोजगारीसँग जोड्ने लक्ष्य राखेको छ ।

बारटेन्डिङ पेशामा पेय पदार्थ, विशेष गरी ककटेल र मकटेलमा स्वादको सन्तुलन (तितोपन, अमिलोपन र गुलियोपन) मिलाउँदै प्रस्तुत गर्ने कला तथा बोतल घुमाउने फ्लेयर सीप प्रदर्शन गरिन्छ ।

प्रतियोगितामा पहिलो हुनेले ४० हजार रुपियाँसहित प्याराग्लाइडिङ, ट्रफी, गिफ्ट ह्याम्पर, सम्मानपत्र र प्रमाणपत्र प्राप्त गर्नेछन् । दोस्रो हुनेले २५ हजार रुपियाँसहित ट्रफी, गिफ्ट ह्याम्पर, सम्मानपत्र र प्रमाणपत्र पाउनेछन् ।

त्यस्तै तृतीय र चतुर्थ हुनेले क्रमशः १५ हजार र ५ हजार रुपियाँसहित गिफ्ट ह्याम्पर, सम्मानपत्र र प्रमाणपत्र प्राप्त गर्नेछन् ।

उत्कृष्ट ककटेलतर्फ ५ हजार रुपियाँसहित बन्जी जम्प, ट्रफी, गिफ्ट ह्याम्पर, सम्मानपत्र र प्रमाणपत्र प्रदान गरिनेछ भने उत्कृष्ट बोतल घुमाउने (फ्लेयर) कलाकारलाई पनि ५ हजार रुपियाँसहित ट्रफी, गिफ्ट ह्याम्पर, सम्मानपत्र र प्रमाणपत्र दिइनेछ । अन्य सहभागीलाई मायाको चिनो र सहभागिता प्रमाणपत्र प्रदान गरिने आयोजकले जनाएको छ ।

एजुकेसन पार्टनर कान्तिपुर टुरिजम एण्ड होटल म्यानेजमेन्ट कलेजले अस्ट्रेलियन सरकारबाट मान्यता प्राप्त दुई वर्षे होटल म्यानेजमेन्ट तथा ६ महिने कुलिनरी आर्ट्स (पाककला) कार्यक्रम सञ्चालन गर्दै आएको अध्यक्ष पौडेलले जानकारी दिनुभयो ।

उक्त कलेजका प्रशिक्षार्थीहरू विदेशका पाँचतारे होटल तथा बार–रेस्टुरेन्टमा बारमेनका रूपमा कार्यरत रहेको उहाँको भनाइ छ ।

कार्यक्रम संयोजक निश्चल देवकोटाका अनुसार प्रतियोगितामा सहभागिताका लागि काठमाडौँ, बुटवल, चितवन, इटहरी र पोखरा लगायत विभिन्न शहरबाट ६७ जनाले प्रारम्भिक प्रतिस्पर्धा गरेका थिए । तीमध्येबाट ३७ जना अन्तिम प्रतिस्पर्धाका लागि छनोट भएका छन् ।

कान्तिपुर टुरिजम एण्ड होटल म्यानेजमेन्ट कलेजमा आयोजित पत्रकार भेटघाट कार्यक्रमको सञ्चालन प्रशासन प्रमुख पुकार ज्ञवालीले गर्नुभएको थियो ।

The post कान्तिपुर ट्रेनिङ सेन्टरद्वारा ‘फ्लेयर मास्टर च्याम्पियनसिप’ आयोजना appeared first on मानव आवाज.

२०४६ सालदेखि पर्यटन व्यवसायमा सक्रिय गैरेले पोखरा नेपालको प्रमुख पर्यटकीय गन्तव्यका रूपमा अझै ठूलो सम्भावना बोकेको उल्लेख गर्नुभएको छ ।

उहाँका अनुसार प्राकृतिक सौन्दर्य, सांस्कृतिक विविधता र आतिथ्यताका कारण पोखरा आन्तरिक तथा बाह्य पर्यटकका लागि आकर्षक गन्तव्य बनेको छ ।

तथापि, राजनीतिक अस्थिरताका कारण पर्यटन क्षेत्रले अपेक्षित गति लिन नसकेको उहाँको भनाइ छ । “राजनीतिक स्थायित्व नहुँदा यो क्षेत्र निकै प्रताडित छ ।”-उहाँले भन्नुभयो ।

गैरेले स्थायित्व र नीतिगत स्पष्टता भएमा पोखराको पर्यटन क्षेत्रले देशको अर्थतन्त्रमा उल्लेखनीय योगदान दिन सक्ने धारणा राख्नुभएको छ ।

The post पर्यटन क्षेत्र चलायमान बनाउन जोसिलो प्रयास appeared first on मानव आवाज.

जिल्लामा पहिलो पटक हरियो घाँसबाट पशु आहार (साइलेज) उत्पादन गर्ने प्लान्ट सञ्चालनमा आएको छ ।

कमलामाई नगरपालिका वडा नं. १ मा स्थापना गरिएको उक्त साइलेज प्लान्ट २०८२ चैत १५ गतेबाट औपचारिक रूपमा सुरु गरिएको हो ।

कमलामाई नगरपालिका र हेफर इन्टरनेशनल नेपालको लागत साझेदारीमा निर्माण गरिएको प्लान्ट ३७ लाख रुपियाँको लागतमा तयार भएको हो ।

परियोजनाअन्तर्गत कमलामाई नगरपालिका वडा नं. ४ मा रहेका होलिस्टिन प्रजातिका गाई पालकहरूको सहकारी-कमलामाई सामाजिक उद्यमी दुग्ध सहकारी संस्था लिमिटेडद्वारा प्लान्ट सञ्चालन गरिनेछ ।

प्लान्टको उद्घाटन कमलामाई नगरपालिकाका मेयर उपेन्द्र कुमार पोखरेलले गर्नुभएको हो । उद्घाटन समारोहमा बोल्दै उहाँले साइलेज प्लान्ट स्थापना हुनु स्थानीय किसानका लागि महत्वपूर्ण उपलब्धि भएको बताउनु भयो ।

उहाँका अनुसार यसले पशुपालन व्यवसायलाई दिगो, व्यवस्थित र उत्पादनमुखी बनाउन सहयोग पुर्‍याउनेछ ।

नगरपालिकाका पशु विकास शाखा प्रमुख डा. रोशन कोइरालाका अनुसार प्लान्ट विशेषगरी सुख्खा समयमा गाईलाई पौष्टिक आहार उपलब्ध गराउने उद्देश्यले सञ्चालन गरिएको हो ।

उहाँले नगरपालिकाबाट ६ लाख ५० हजार, हेफर इन्टरनेशनलबाट ८ लाख ५० हजार र थप २२ लाख बराबरको मेसिन सहयोगसहित कुल ३७ लाख रुपियाँ लगानी भएको जानकारी दिनु भयो ।

साइलेज प्लान्ट सञ्चालनमा आएपछि गाईलाई पोषिलो आहार उपलब्ध गराउन, दाना खर्च घटाउन र लामो समयसम्म आहार सुरक्षित राख्न सहज हुने अपेक्षा गरिएको छ ।

नगर प्रमुख पोखरेलले यसले स्थानीय उत्पादन वृद्धि, लागत न्यूनीकरण तथा किसानको आम्दानी अभिवृद्धिमा टेवा पुर्‍याउने विश्वास व्यक्त गर्नु भयो ।

उहाँले उक्त प्लान्ट सिन्धुली जिल्लाकै पहिलो साइलेज उत्पादन केन्द्र भएको उल्लेख गर्दै यसलाई जिल्लाभरिका कृषकका लागि नमूना परियोजनाका रूपमा विकास गर्ने प्रतिबद्धता जनाउनु भयो ।

कमलामाई नगरपालिका वडा नं. १ का अध्यक्ष नरेश गोलेको अध्यक्षतामा सम्पन्न उद्घाटन कार्यक्रममा सिड्स नेपालका अध्यक्ष दीपक घिमिरे, हेफर इन्टरनेशनलको मिल्की वे परियोजनाका प्रबन्धक डा. नारायण शर्मा, पशु विकास शाखा प्रमुख डा. रोशन कोइराला, कमलामाई सामाजिक उद्यमी दुग्ध सहकारी संस्थाका अध्यक्ष गुणकुमारी घिमिरेलगायत सहकारीका सदस्य तथा कर्मचारीहरूको सहभागिता रहेको आयोजकले जनाएको छ ।

The post सिन्धुलीमा पहिलो साइलेज प्लान्ट सञ्चालनमा, किसानलाई राहत हुने अपेक्षा appeared first on मानव आवाज.

कलेजका प्रिन्सिपल प्रकाश रेग्मीका अनुसार तालिममा होटल तथा पर्यटन क्षेत्रका प्रतिनिधि, टोल विकास संस्था, सामाजिक सङ्घसंस्थाका प्रतिनिधि तथा इच्छुक सर्वसाधारणको सहभागिता रहेको छ ।

तालिममा भारतबाट आएका प्रशिक्षक नरहरि गुप्ता र भरत विश्वनाथ, भेगन ट्राभल एसियाका सहसंस्थापक ज्याक लोभाज तथा आतिथ्य क्षेत्रका अनुभवी विज्ञ आरएच सिंह चौहानले प्रशिक्षण दिइरहनुभएको छ ।

२६ वर्षदेखि पर्यटन तथा होटल व्यवस्थापन शिक्षा प्रदान गर्दै आएको कलेजले यस तालिममार्फत शिक्षा सँगसँगै उत्पादन र रोजगारी सिर्जनातर्फ अग्रसर हुने लक्ष्य लिएको जनाएको छ । विदेशी संस्था र विज्ञहरूको सहकार्यमा कलेजले तोफु उत्पादन प्रविधि भित्र्याएको हो ।

तालिमका मुख्य आकर्षणमध्ये भेगन ट्राभल एसियाका विज्ञहरूको सहभागिता रहेको छ । कलेजको पूर्वाधार र गुणस्तरबाट प्रभावित भई विदेशी टोलीले अत्याधुनिक तोफु मेसिन उपहारस्वरूप प्रदान गरेको छ, जुन हाल जडानको चरणमा रहेको छ ।

प्रिन्सिपल रेग्मीले स्वस्थ जीवनशैली प्रवर्धन गर्दै भेगन खाद्य संस्कृतिको विकास र भटमासबाट तयार हुने उच्च प्रोटिनयुक्त तोफुलाई स्थानीय बजारमा विस्तार गर्ने योजना रहेको बताउनु भयो ।

कलेजले उत्पादन गर्ने तोफुलाई पोखराका अस्पताल, होटल तथा क्याम्पहरूमा ब्राण्डेड उत्पादनका रूपमा आपूर्ति गर्ने लक्ष्य राखिएको छ ।

उहाँले यो तालिम केवल सीप अभिवृद्धिमा सीमित नभई भविष्यका प्रशिक्षक उत्पादन गर्ने अवसरसमेत भएको उल्लेख गर्नु भयो ।

आगामी दिनमा ठूलो मात्रामा उत्पादन र प्याकेजिङका लागि तालिमप्राप्त व्यक्तिहरूलाई नै रोजगारीमा प्राथमिकता दिइने पनि उहाँले जानकारी दिनु भयो ।

तालिममा कलेजका कर्मचारी, होटलका सेफ, टोल विकास समितिका प्रतिनिधि तथा महिला सशक्तीकरणसँग सम्बन्धित संस्थाका सदस्यहरूको सहभागिता रहेको छ ।

यसले पोखराको पर्यटन बजारमा नयाँ र स्वस्थ खाद्य परिकारको विकल्प थप्ने विश्वास गरिएको छ ।

The post एनटिएचएमसीमा तोफु उत्पादन तालिम सुरु appeared first on मानव आवाज.

पोखरा महानगरपालिका-९, बास्तोलाथरमा २०८२ चैत १४ गते आयोजित कार्यक्रममा प्रमुख अतिथि प्राविधिक शिक्षा तथा व्यावसायिक तालीम परिषद् गण्डकी प्रदेशका सहप्रबन्धक जीवन भण्डारीले प्रमाणपत्र केवल प्राप्तिका लागि नभई त्यसको सही प्रयोग गर्दै पेशाको मर्यादा कायम राख्न प्रशिक्षार्थीहरूलाई आग्रह गर्नु भयो ।

उहाँले प्रविधिसँग निरन्तर जोडिँदै दक्षता अभिवृद्धि गर्दै अघि बढ्नुपर्नेमा जोड दिनु भयो । साथै व्यवसाय सञ्चालन गर्दा स्वच्छ, सफा, सुन्दर र व्यवस्थित वातावरण कायम गर्नुपर्ने बताउनु भयो ।

कार्यक्रममा एशोसिएसनका अध्यक्ष विष्णुप्रसाद अधिकारीले विभिन्न सवारी साधनहरूको मर्मत सम्भारमा संलग्न मेकानिक्सहरूको साझा संस्थाले विगत ३३ वर्षदेखि पोखरामा मेकानिक्स तथा व्यवसायीहरूको हकहितका लागि काम गर्दै आएको जानकारी दिनु भयो ।

उहाँका अनुसार संस्थाले क्यालेन्डर प्रकाशन, वार्षिक उत्सव, रक्तदान कार्यक्रम, सीप स्तरोन्नति तालिम, व्यवसाय प्रवर्धन तथा वर्कसप व्यवस्थापनसम्बन्धी कार्यक्रमहरू सञ्चालन गर्दै आएको छ ।

कार्यक्रममा नेपाल अटो मेकानिक्स व्यवसायी महासङ्घका स्वास्थ्य सल्लाहकार रविन्द्रप्रसाद श्रेष्ठ, प्रेस सल्लाहकार कृष्णबहादुर थापा, बरिष्ठ उपाध्यक्ष कुलबहादुर नेपाली तथा क्यालेन्डर उपसमिति संयोजक अमृत तिमिल्सिनालगायतले शुभकामना मन्तव्य व्यक्त गर्नुभएको थियो ।

प्राविधिक शिक्षा तथा व्यावसायिक तालिम परिषद् गण्डकी प्रदेश, पोखराका सीप विकास परीक्षक कुन्दन शर्मा तथा एसओएस व्यावसायिक तालीम केन्द्र छोरेपाटनका सीप विकास परीक्षक कुन्दन केसीले कार्यक्रम सहजिकरण गर्नुभएको थियो ।

राष्ट्रिय सीप परीक्षण समितिद्वारा निर्धारित मापदण्डअनुसार २०८२ कात्तिक १७ गतेदेखि २३ गतेसम्म सञ्चालन गरिएको लाइट भेइकल मेकानिक व्यवसाय तह-२ को सीप परीक्षणमा सहभागी १४ जनामध्ये १० जना दीक्षित भएका छन् ।

दीक्षित हुनेहरूमा निहाल अन्सारी, अमृत तिमिल्सिना, सहजाद आलम, जयप्रकाश शर्मा, सुनिल घताने, चन्द्रकान्त विक, विधान बस्ताकोटी, अनुराग चौधरी, विजेन्द्र चौधरी र भुवन जिसी रहनु भएको छ । दीक्षितहरूलाई राष्ट्रिय सीप प्रमाणपत्र प्रदान गरिएको थियो ।

एशोसिएसनका अध्यक्ष विष्णुप्रसाद अधिकारीको अध्यक्षतामा सम्पन्न कार्यक्रमको स्वागत मन्तव्य कानुनी सल्लाहकार वरिष्ठ अधिवक्ता माधवराज बास्तोलाले गर्नुभएको थियो भने कार्यक्रम सञ्चालन महासचिव विजेन्द्र चौधरीले गर्नुभएको थियो ।

The post गण्डकी अटो मेकानिकलमा सीप परीक्षण तालिमबाट १० जना दीक्षित appeared first on मानव आवाज.

पोखरा उद्योग वाणिज्य सङ्घको अमृत कक्षमा आयोजित कार्यक्रममा सङ्घका अध्यक्ष गोकर्ण कार्कीले सिप तालिम तथा रोजगारीको क्षेत्रमा कार्यरत वा अनौपचारिक रूपमा सिप हासिल गरेका कामदार, श्रमिकका सङ्घसंस्थामा आबद्ध व्यक्तिहरू, स्थानीय रोजगारदाता तथा व्यवसायीहरूसँग समन्वय गर्दै सीपयुक्त जनशक्ति परिचालनलाई प्रभावकारी बनाउने उद्देश्यले कार्यक्रम आयोजना गरिएको बताउनु भयो ।

साथै, अभिमुखीकरणसँगै फाराम भर्ने कार्यमा सहजीकरण गरिएको उहाँले जानकारी दिनु भयो ।

कार्यक्रममा सामाजिक विकास, युवा तथा खेलकुद मन्त्रालयका उपसचिव प्रकाश देवकोटा, पोखरा महानगरपालिका व्यवसाय प्रवर्द्धन केन्द्रका निर्देशक नवराज अधिकारी तथा चन्द्रप्रसाद तिमिल्सिनाले सहजीकरण गर्नुभएको थियो ।

कार्यक्रममा रोजगारदाता र रिकोग्निशन अफ प्रियर लर्निङ ग्राज्युएटबिच अन्तरक्रिया गरिएको थियो ।

यसले सीप र रोजगारीबिचको समन्वयलाई थप सुदृढ बनाउने अपेक्षा गरिएको सङ्घकी महासचिव शोभा गौतमले जानकारी दिनु भयो ।

उक्त कार्यक्रममा श्रमिकका सङ्घसंस्थामा आबद्ध व्यक्तिहरू, स्थानीय रोजगारदाता तथा व्यवसायी गरी ९५ जनाको सहभागिता रहेको थियो ।

The post सीपयुक्त जनशक्ति परिचालनसम्बन्धी अभिमुखीकरण सम्पन्न appeared first on मानव आवाज.

पोखरा । बिहानको चिया पकाउँदै गर्दा सावित्री घिमिरे अधिकारी आफ्नो घरको कौसीमा पुग्नुहुन्छ । माटो छोएर हेर्नुहुन्छ, सागका पातहरूमा टाँसिएका शीतका थोपा टिप्नुहुन्छ र मुस्कुराउँदै भन्नुहुन्छ-“यो कौसी अब खाली छत होइन, हाम्रो सानो बारी हो ।”

पोखरा महानगरपालिका वडा नम्बर-८, नागढुङामा बसोबास गर्ने घिमिरे जस्तै धेरै घरधुरीका लागि कौसीखेती अहिले केवल रहर मात्र होइन, दैनिकी र आम्दानीको आधार बन्दै गएको छ ।

कुहिने फोहोरबाट बनेको मल, आफ्नै हातले तयार पारेको जैविक विषादी र सीमित ठाउँमै उत्पादन हुने ताजा तरकारीले शहरी जीवनशैलीलाई हरियालीतर्फ मोडेको छ ।

“पहिले फोहोर फाल्ने चिन्ता हुन्थ्यो ।”-घिमिरे भन्नुहुन्छ-“अहिले फोहोर नै मल बन्छ ।” घरबाट निस्कने तरकारीका बोक्रा, कुहिएका पात, भान्साको जैविक फोहोर-यी सबै कम्पोस्ट बिन, भर्मी कम्पोस्ट र झोल मलमा रूपान्तरण हुन्छन् । यसरी बनेको मलले कौसीमा गोलभेँडा, साग, धनियाँ, खुर्सानी, काउली, बन्दा जस्ता तरकारी सहजै फलिरहेका छन् ।

पोखरा महानगरपालिकाको केही क्षेत्रमा घरघरबाट फोहोर सङ्कलन नहुँदा पनि स्थानीयहरूले समस्या होइन, समाधान खोजेका छन् । कुहिने फोहोर घरमै व्यवस्थापन हुन्छ, नकुहिने प्लास्टिकजन्य फोहोर बेचिन्छ । बाँकी फोहोर न्यून हुन्छ । “फोहोरलाई मोहोर बनाउने भनेको यही रहेछ ।”-घिमिरे हाँस्दै भन्नुहुन्छ ।

कौसीखेतीको यो अभियान पोखरा महानगरपालिका आर्थिक विकास महाशाखा अन्तर्गत कृषि विकास शाखाको पहलमा अघि बढिरहेको छ । ‘कृषि जैविक विविधता हाम्रो अमूल्य सम्पदा : संरक्षण, प्रवर्धन र उपयोगमा युवा सहभागिता’ भन्ने नारासहित महानगरले ३३ वटै वडामा कौसीखेती प्रवर्धन कार्यक्रम सञ्चालन गरेको छ ।

आर्थिक विकास महाशाखा प्रमुख मनहर कडरियाका अनुसार शहरी फोहोर व्यवस्थापन, हरियाली विस्तार, स्वस्थ्य खाद्य उत्पादन र आत्मनिर्भरता कार्यक्रमको मुख्य उद्देश्य हो । “घरमै अर्गानिक तरकारी उत्पादन हुँदा स्वास्थ्य र खर्च दुवैमा फाइदा हुन्छ ।”-उहाँ भन्नुहुन्छ-“यसले शहरलाई पनि सफा र हरियो बनाउँछ ।”

पोखरा महानगरपालिका वडा नम्बर-८ को समन्वय र कृषि महाशाखाको ५० प्रतिशत अनुदानमा वडास्तरीय कृषि सञ्जालमार्फत कौसी तथा करेसाखेती गर्ने कृषकलाई प्रोत्साहन गरिएको छ । पहिलो चरणमै ३५ घरधुरीलाई ५-१० केजीका दरले आलुको बीउ र ४३० घरधुरीलाई ५/५ केजी प्राङ्गारिक मल वितरण गरिएको छ ।

वडास्तरीय कृषि सञ्जाल पोखरा-८ की अध्यक्ष समेत रहेकी घिमिरे भन्नुहुन्छ-“सिक्ने–सिकाउने अवसरले आत्मविश्वास बढाएको छ । अब हामीले आफैँ उत्पादन गर्छौं, आफैँ खान्छौं ।”

पोखरा महानगरपालिका वडा नम्बर-७ की गङ्गा अर्याल सुवेदीका लागि कौसीखेती बिहानको व्यस्तताबिचको सन्तोष हो । “दैनिक भान्सामा चाहिने तरकारी कौसीमै पाइन्छ ।”-उहाँ भन्नुहुन्छ-“फोहोर पनि मल बन्छ, तरकारी पनि फल्छ-दुबै फाइदा ।”

उहाँका अनुसार वडा कार्यालयबाट समयसमयमा पाइने प्राविधिक र सामग्री सहयोगले कौसीखेतीलाई निरन्तरता दिन सहज भएको छ ।

नागढुङा क्षेत्रबाट करिब १० प्रतिशत मात्र फोहोर डम्पिङ साइटमा जाने गरेको तथ्यले कौसीखेती र फोहोर व्यवस्थापनको प्रभाव देखाउँछ । कुहिने फोहोरबाट मल, नकुहिनेबाट आम्दानी र कौसीमा हरियाली-यो संयोजनले शहरी जीवनशैलीमा नयाँ सोच भित्र्याएको छ ।

घिमिरे जस्तै धेरै स्थानीयको अनुभवले देखाउँछ-कौसीखेती केवल तरकारी उत्पादन होइन, शहरसँगको सम्बन्ध पुनः परिभाषित गर्ने अभियान हो ।

पोखरा महानगरपालिका आर्थिक विकास महाशाखाले मौरी तथा मह मेला, सुन्तला महोत्सव, कृषि जैविक विविधता प्रदर्शनी, कृषि क्विज लगायतका कार्यक्रममार्फत स्थानीय कृषि र जैविक विविधताको प्रवर्द्धन गर्दै आएको छ ।

पोखराका घरघरमा फैलिँदै गएको यो हरियाली यात्राले एउटा सन्देश दिन्छ-ठूलो खेत नभए पनि सानो कौसीमै आत्मनिर्भरता, स्वास्थ्य र आम्दानी सम्भव छ । फोहोरलाई मोहोरमा बदल्ने यही यात्रामा पोखरा अघि बढिरहेको छ ।

The post कौसीमा उम्रिएको हरियाली सपना appeared first on मानव आवाज.

तालिम उद्घाटन समारोहमा प्रमुख अतिथि पोखरा महानगरपालिकाका प्रमुख प्रशासकीय अधिकृत मुक्तिराम अर्यालले गण्डकी प्रदेश प्रशिक्षण प्रतिष्ठानसँगको सहकार्यमा तालिम सञ्चालन गर्न पाउँदा स्थानीय तहको क्षमता विकासका लागि प्रतिष्ठान सँगै रहेको अनुभूति भएको बताउनु भयो ।

उहाँले तालिमले स्थानीय तहमा उद्यमशीलता विकासका लागि ज्योतिका रूपमा काम गर्ने र स्थानीय उत्पादन प्रवर्धनमा सहयोग पुग्ने विश्वास व्यक्त गर्नु भयो ।

साथै, पोखरा महानगरभित्रका कर्मचारी र सरोकारवालालाई क्षमता र सीप विकाससम्बन्धी तालिम आवश्यक रहेको उल्लेख गर्दै यस्ता तालिम प्रतिष्ठानबाट निरन्तर प्रदान हुनुपर्ने धारणा राख्नु भयो ।

गण्डकी प्रदेश प्रशिक्षण प्रतिष्ठानका कार्यकारी निर्देशक सुरेन्द्रबाबु तिवारीले स्थानीय तहको आयोजना र जिपिटिए सहजीकरणमा टिओटी तालिम पहिलो पटक सञ्चालन गरिएको जानकारी दिनु भयो ।

उहाँले यस किसिमको सहजीकरणले सङ्घीयता सवलीकरणमा महत्वपूर्ण भूमिका खेल्ने बताउँदै तालिमका लागि छनोट भएका प्रशिक्षार्थीलाई बधाई तथा शुभकामना व्यक्त गर्नु भयो ।

तालिममा प्रशिक्षकका रूपमा प्रतिष्ठानका निर्देशक लक्ष्मण तिमिल्सिना तथा प्रशिक्षण तथा अनुसन्धान अधिकृत इन्जिनियर मनोज पौडेलले प्रशिक्षार्थीहरूको क्षमता विकाससँगै सफल उद्यमी बन्न आवश्यक सहजीकरण सीप प्रदान गरिनेमा जोड दिनु भयो ।

निर्देशक तिमिल्सिनाले प्रतिष्ठानले प्राप्त गरेको आइएसओ स्ट्यान्डर्ड ९००१:२०१५ को कार्यविधिभित्र रहेर तालिम सञ्चालन हुने जानकारी दिनु भयो ।

तालिममा सहभागी प्रशिक्षार्थी मौसम तिमिल्सिनाले पोखरामै उद्यमशीलता विकास प्रशिक्षक प्रशिक्षण प्राप्त गर्न पाउँदा खुसी लागेको प्रतिक्रिया दिनु भयो ।

पोखरा महानगरपालिका आर्थिक विकास महाशाखा प्रमुख मनहर कडरियाले तालिमबाट ज्ञानसँगै उद्यमशीलतासँग सम्बन्धित सीप विकास हुने अपेक्षा व्यक्त गर्नु भयो ।

उहाँका अनुसार स्थानीय स्तरको आर्थिक विकासमा योगदान पुर्‍याउने उद्देश्यसहित स्थानीय तहकै उद्यमशील प्रशिक्षक उत्पादन गर्नु तालिमको मुख्य लक्ष्य हो । यसले स्थानीय जनशक्ति उत्पादनमा कोसेढुङ्गा सावित हुने विश्वास उहाँले व्यक्त गर्नु भयो ।

पोखरा महानगरपालिका व्यवसाय प्रवर्धन केन्द्रको सभाहलमा सञ्चालन भइरहेको उक्त तालिममा विभिन्न क्षेत्रका १८ जना प्रशिक्षार्थीहरूको सहभागिता रहेको छ ।

गण्डकी प्रदेश प्रशिक्षण प्रतिष्ठान गण्डकी प्रदेश सरकारको तालिम तथा अनुसन्धान प्रदायक एक स्वायत्त संस्था रहेको जानकारी प्रशिक्षण तथा अनुसन्धान अधिकृत इन्जिनियर मनोज पौडेलले दिनु भयो ।

उहाँका अनुसार प्रतिष्ठानले सेवाकालीन, सेवा प्रवेश तथा प्रदेशभित्रका कर्मचारी र जनप्रतिनिधिको क्षमता विकाससम्बन्धी तालिम सञ्चालन गर्दै आएको छ ।

हाल प्रदेश र स्थानीय तहको साझेदारीमा विभिन्न तालिम तथा अनुसन्धानका कार्यक्रमहरू सञ्चालन भइरहेका छन् ।

कार्यक्रम पोखरा महानगरपालिका आर्थिक विकास महाशाखा प्रमुख मनहर कडरियाको अध्यक्षतामा सम्पन्न भएको थियो भने कार्यक्रम सञ्चालन व्यवसाय प्रवर्धन केन्द्रका प्रमुख नवराज अधिकारीले गर्नुभएको थियो ।

The post पोखरामा उद्यमशीलता विकाससम्बन्धी १० दिने तालिम सुरु appeared first on मानव आवाज.