सिन्धुली । आफ्ना प्रियजनको शव भेटिएला र अन्तिम संस्कार गर्न पाइएला भन्ने आशा २३ दिनसम्म पनि पूरा नभएपछि कमलामाई नगरपालिका-११ का १० परिवारले अन्ततः कुशको शव बनाएर सामूहिक दाहसंस्कार गरेका छन् ।
भोटेकोशी र त्रिशूली नदीमा २०८३ भदौ १० गते बिहान आएको भीषण बाढीमा परेर बेपत्ता भएका आफ्ना गाउँका १० जनाको खोजी गर्दा कुनै पत्तो नलागेपछि पारिस्थितिक अवस्थाको मूल्याङ्कन गरी परिवारजनले धार्मिक तथा सांस्कृतिक परम्पराअनुसार २०८३ असोज १ गते बिसारेबेँसी खोलामा कुशको पुतला अर्थात् कुशको शव बनाएर सामूहिक दाहसंस्कार गरेका हुन् ।
कामको सिलसिलामा घरबाट टाढा रसुवाको भोटेकोशी-त्रिशूली क्षेत्रमा पुगेका उनीहरू बाढीमा परेर बेपत्ता भएका थिए ।
२३ दिनसम्म आफन्त तथा स्थानीयस्तरबाट खोजी कार्य जारी राखिए पनि उनीहरूको अवस्था पत्ता लाग्न सकेन ।
शवसमेत फेला नपरेपछि परिवारजनले भारी मनले कुशकै शवलाई आफ्ना प्रियजनको प्रतीक मानेर अन्तिम संस्कार गरेका हुन् ।
बाढीमा परेर बेपत्ता हुनेमा कमलामाई नगरपालिका-११ का राजकुमार श्रेष्ठ, बुद्धिविक्रम थापा, लक्ष्मण सापकोटा, बलबहादुर माझी, सोमबहादुर माझी, भरतबहादुर माझी, बखतबहादुर माझी, टंकबहादुर श्रेष्ठ, विष्णुबहादुर श्रेष्ठ र प्रेमकुमार घलान रहनुभएको छ ।
बिसारेबेँसीमा गरिएको सामूहिक दाहसंस्कारमा मृतकका आफन्त, छरछिमेकी तथा जनप्रतिनिधिको उपस्थिति थियो ।
आफ्ना प्रियजनको भौतिक शरीरसमेत देख्न नपाई कुशको शवमा दागबत्ती दिनुपरेपछि मृतकका परिवार मात्र होइन, सिङ्गो बिसारेबेँसी गाउँ नै शोकमा डुबेको छ ।
बाढी गएको २३ दिन बितिसक्दा पनि बेपत्ता आफन्तको कुनै खबर नआएपछि परिवारजनका लागि प्रतीक्षा झन् पीडादायी बनेको छ ।
प्राकृतिक विपत्तिले घरपरिवारका सदस्य गुमाएका उनीहरूलाई अन्तिम पटक अनुहार हेर्न र आफ्नै हातले अन्तिम संस्कार गर्नसमेत नपाएको पीडा थपिएको छ ।
काम र रोजगारीका लागि घरबाहिर गएका व्यक्तिहरू एकैपटक विपत्तिमा परेपछि कमलामाई नगरपालिका-११ मा शोक छाएको छ ।
गाउँका परिवारहरूले एकैपटक धेरै आफ्ना सदस्य गुमाएका छन् । तर, उनीहरूको मृत्युको पुष्टि गर्ने भौतिक प्रमाणका रूपमा शवसमेत फेला नपरेपछि परिवारजनको पीडा अझ गहिरिएको छ ।
यसैबिच, कमलामाई नगरपालिका-३ का स्थानीय हेमप्रसाद गौतमको शवसमेत फेला नपरेपछि आफन्तजनले कुशको शव बनाएर गडौली खोलामा दाहसंस्कार गरेका छन् ।
बाढीमा बेपत्ता भएका व्यक्तिहरूका परिवार तथा स्थानीय जनप्रतिनिधिले मृतकप्रति दुःख व्यक्त गर्दै शोकसन्तप्त परिवारजनप्रति समवेदना प्रकट गरेका छन् ।
उनीहरूले पीडित परिवारलाई आवश्यक राहत तथा क्षतिपूर्तिको व्यवस्था गर्न सरकारसँग मागसमेत गरेका छन् ।
शव नभेटिए पनि संस्कार रोकिएन । २३ दिनको खोजी, प्रतीक्षा र अनिश्चिततापछि परिवारजनले कुशकै शवमा दागबत्ती दिए । तर, त्यो दागबत्तीले उनीहरूको मनमा रहेको पीडा भने निभाउन सकेको छैन ।
