काठमाडौँ । बङ्गलादेशकी पहिलो महिला प्रधानमन्त्री एवम् पूर्वप्रधानमन्त्री तथा बङ्गलादेश नेशनलिस्ट पार्टी (बीएनपी) की अध्यक्ष खालिदा जियाको ८० वर्षको उमेरमा निधन भएको बिबिसीले जनाएको छ ।
अस्वस्थताका कारणा लामो समयदेखि भइरहेको उपचारका क्रममा २०८२ पुस १५ गते बिहान उहाँको निधन भएको हो ।
परिवार तथा पार्टी स्रोतका अनुसार उहाँलाई २० दिनदेखि भेन्टिलेटरमा राखेर उपचार भइरहेको थियो ।
छातीको सङ्क्रमण, कलेजो तथा मिर्गौलामा समस्या, मधुमेह, बाथ र आँखासम्बन्धी विभिन्न जटिल स्वास्थ्य समस्याबाट पीडित जियाको स्वास्थ्य अवस्था पछिल्ला दिनहरूमा थप गम्भीर बन्दै गएको थियो ।
खालिदा जियाले सन् १९९१ देखि १९९६ र २००१ देखि २००६ सम्म गरी दुई कार्यकाल बङ्गलादेशको प्रधानमन्त्रीको जिम्मेवारी सम्हाल्नु भएको थियो । उहाँ पूर्व राष्ट्रपति जिया–उर–रहमानकी पत्नी हुनुहुन्छ ।
बङ्गलादेशको राजनीतिक इतिहासमा महत्वपूर्ण भूमिका निर्वाह गर्नु भएकी खालिदा जिया देशकै पहिलो महिला प्रधानमन्त्रीका रूपमा समेत चिनिनुहुन्छ । उहाँको निधनसँगै बङ्गलादेशी राजनीतिले एक प्रभावशाली नेतृत्व गुमाएको छ ।
उहाँको निधनप्रति बङ्गलादेशभर शोक व्यक्त गरिएको छ भने राजनीतिक दलका नेता, समर्थक तथा सर्वसाधारणले श्रद्धाञ्जली अर्पण गरिरहेका छन् ।
