काठमाडौं । विश्व ट्रेड युनियन महासङ्घले भेनेजुएलामाथि संयुक्त राज्य अमेरिकाले गरेको सैन्य आक्रमण र हस्तक्षेपको कडा निन्दा गर्दै तत्काल आक्रमण रोक्न माग गरेको छ ।
काठमाडौंमा रहेको महासङ्घको समन्वय समितिले एक प्रेस विज्ञप्ति जारी गर्दै भेनेजुएलाको सार्वभौमसत्ता, राष्ट्रिय स्वतन्त्रता र जनताको आत्मनिर्णयको अधिकारमाथि भएको हस्तक्षेप अस्वीकार्य भएको जनाएको छ ।
विज्ञप्तिमा भनिएको छ-‘अमेरिकी कदम संयुक्त राष्ट्रसङ्घको बडापत्रको धारा १ र २ को स्पष्ट उल्लङ्घन हो ।’
यसले अन्तर्राष्ट्रिय कानुन, स्वतन्त्र राष्ट्रहरूको समानता र बल प्रयोग नगर्ने सिद्धान्तमाथि गम्भीर प्रहार गरेको महासङ्घको ठहर छ ।
यस्तो आक्रमणले ल्याटिन अमेरिका र क्यारेबियन क्षेत्रमा मात्र होइन, विश्व शान्ति र स्थायित्वमै गम्भीर खतरा सिर्जना गरेको उल्लेख गरिएको छ ।
महासङ्घले अमेरिकी आक्रमणको मुख्य उद्देश्य भेनेजुएलाको प्राकृतिक स्रोत, विशेषगरी तेल तथा खनिजमाथि नियन्त्रण जमाउने र त्यहाँको वैध सरकारलाई अस्थिर बनाउने रहेको आरोप लगाएको छ ।
तर, भेनेजुएलाका जनता र सरकारले आफ्नो सार्वभौम अधिकारको रक्षा गर्न दृढ सङ्कल्पसहित प्रतिरोध गरिरहेको विज्ञप्तिमा उल्लेख छ ।
