ललितपुर । जल तथा मौसम विज्ञान विभाग, मौसम पूर्वानुमान महाशाखाबाट जारी गरिएको मौसमी पूर्वानुमान अनुसार असोज १७ गतेदेखि असोज २० गतेसम्म देशका विभिन्न स्थानमा मनसुनजन्य क्रियाकलाप सक्रिय हुने देखिएको छ ।
विशेषगरी गण्डकी, लुम्बिनी, बागमती, कोशीलगायत प्रदेशका धेरै स्थानमा उच्च मात्रामा वर्षा हुने भएकाले विपद्को जोखिम बढ्न सक्ने अनुमान गरिएको छ ।
यसै सन्दर्भमा जिल्ला प्रशासन कार्यालय ललितपुरले विशेष सतर्कता अपनाउन अनुरोध गरेको छ ।
प्रशासनले नागरिकलाई विशेषगरी रातको समयमा सवारीसाधन सञ्चालन नगर्न, अत्यावश्यक भएमा मात्रै यात्रा गर्न र उच्च सतर्कता अपनाउन आग्रह गरेको छ ।
नदीनाला आसपास तथा भिरालो भूभागमा बसोबास गर्ने स्थानीयलाई अझै बढी सतर्क रहन पनि आग्रह गरिएको छ ।
मनसुनको सक्रियताका कारण काठमाडौं उपत्यकासहित मकवानपुर, चितवन, ललितपुर, सिन्धुली, रामेछाप, दोलखा, भक्तिुपर, धादिङ, नुवाकोट, रसुवा, सिन्धुपाल्चोकलगायतका जिल्लामा भूक्षय, पहिरो, बाढी, डुबान तथा सडक अवरुद्धजस्ता समस्या आउने सम्भावना रहेको जनाइएको छ ।
