महिला स्वास्थ्य स्वयम्सेविका सञ्जाल कास्कीद्वारा “सेवा भाग–३” तीज गीत सार्वजनिक
पोखरा । पोखरा महानगरपालिकाको समन्वयमा महिला स्वास्थ्य स्वयम्सेविका सञ्जाल कास्कीले हरितालिका तीज २०८२ को अवसरमा तीज गीतमार्फत स्वास्थ्य सचेतना अभिवृद्धि गर्ने उद्देश्यले “समाज परिवर्तनका लागि सेवा भाग–३” तीज गीत सार्वजनिक गरेको छ ।
गीतमार्फत स्वस्थ शरीर, स्वच्छ खानपान, योग र ध्यान जस्ता विषयलाई जोड दिइएको छ । गीतमा “खानपिनका कारणले लागेका छन् रोग कति, परिवारमा आमा रहिछन् पहिलो ओखती” जस्ता सारगर्भित शब्दहरू छन् जसले महिला–केन्द्रित स्वास्थ्य सन्देश प्रवाह गर्छ ।
गीतमा सीता पराजुली र राजेश्वरी ढुङ्गानाको स्वर तथा सीता पराजुली, राजेश्वरी ढुङ्गाना, कृष्ण माया पौडेल र मिरा गिरीको शब्द रचना रहेको छ ।
गीता भण्डारी, सङ्गीता बराल, रमा सिके, दुर्गा बानिया र मिरा गिरीको व्यवस्थापन रहेको गीतको निर्देशन भिमा पौडेलले र सङ्गीत संयोजन तथा भिडियो निर्माण बासुरी रेकर्डिङ स्टुडियोले गरेको छ । यो गीतको एरेन्ज दिवस थापामगरले गर्नु भएको छ ।
गीतमा महिला स्वास्थ्य स्वयम्सेविका सञ्जाल कास्कीका स्वयम्सेविका दिदीबहिनीहरूको अभिनय रहेको छ ।
अध्यक्ष भिमा पौडेलले यसअघि सार्वजनिक भएका “सेवा भाग–१” र “२” गीतहरू लोकप्रिय भइसकेको उल्लेख गर्दै यसपटकको गीतले पनि स्वास्थ्य सचेतनालाई समुदायसम्म पुर्याउने अपेक्षा व्यक्त गर्नुभयो ।
पोखरा महानगरपालिकाको स्वास्थ्य महाशाखा लगायत सम्पूर्ण शुभेच्छुक र सहयोगी निकायप्रति अध्यक्ष पौडेलले आभार व्यक्त गर्नुभयो ।
सार्वजनिक गीतमा तीज गीतमार्फत स्वास्थ्य सन्देशको प्रवाह, महिलालाई लक्षित गर्दै स्वच्छ खानपिन, योग, र स्वास्थ्य पहुँचको महत्त्व, स्वास्थ्य स्वयम्सेविकाहरूको सक्रियता र समर्पण तथा स्थानीय स्रोत, आवाज, निर्देशन र प्रस्तुति रहेको छ ।
