धनगढी । कञ्चनपुरको कृष्णपुर नगरपालिका–१ मा छाउपडी गोठमा सुतिरहेकी एक महिलाको सर्पदंशबाट मृत्यु भएपछि जिल्ला प्रशासन सक्रिय भएको छ।
प्रशासनले जिल्लाका सबै स्थानीय तहलाई छाउगोठ भत्काउने अभियान तत्काल सुरु गर्न निर्देशन दिएको छ।
अस्तिशुक्रबार राति छाउगोठमा सुतेकी २८ वर्षीया कमला आउजी दमाईलाई सर्पले डसेको थियो। सर्पदंशबाट गम्भीर अवस्थामा आउजीलाई उपचारका लागि धनगढीस्थित सेती प्रादेशिक अस्पताल पुर्याइएको भएपनि २०८२ असार २८ गते बिहान मृत्यु भएको हो
घटनापछि प्रमुख जिल्ला अधिकारी लक्ष्मण ढकालले २०८२ असार ३० गते सोमबार जिल्लाका सबै नौ ओटै स्थानीय तहलाई परम्परागत कुप्रथाको रूपमा रहेको छाउपडी प्रथाको अन्त्य गर्न विशेष अभियान चलाउन निर्देशन दिएका हुन्।
“केवल छाउगोठ भत्काउने मात्र होइन, यो प्रथाविरुद्ध सचेतनामूलक कार्यक्रम पनि सँगसँगै हुनुपर्छ ।”-एक स्थानीय महिलावादी अभियन्ताले भन्नु भयो-“हरेकपटक ज्यान गइसकेपछि मात्रै प्रशासन झस्किन्छ, तर नियमित शतर्कता र शिक्षा अभियानको खाँचो अझै छ।”
हिजो आइतबार नै कृष्णपुर नगरपालिकाले पनि आफ्ना सबै वडालाई १५ दिनभित्र सबै छाउपडी गोठ भत्काउन निर्देशन दिएको छ।
यस अवधिमा नमान्नेहरूलाई कानुनी कारबाही गर्ने र १० हजार रुपियाँसम्म जरिबाना गरिने चेतावनी समेत दिइएको छ।
सङ्घीय सरकारदेखि स्थानीय तहसम्म नै छाउपडी प्रथा अन्त्यका लागि कानुन बनाइएको छ। तर, चेतना अभाव, सामाजिक डर र धार्मिक मान्यताका कारण यो प्रथा अझै पनि टड्कारो रूपमा जीवित छ।
कमलाको मृत्युले फेरि एकपटक समाजलाई झकझक्याएको छ-कागजमा मात्र होइन, व्यवहारमै छाउपडी अन्त्य गर्ने हो कि ?
यसैबिच नेकपा एस निकट अनेमसङ्घले छाउगोठमा आउजीको मृत्यु भएको घटनाले स्तब्ध भएको जनाएको छ । अनेमसङ्घकी अध्यक्ष मुनु सिग्देलद्वारा जारी विज्ञप्तिमा घटनाको अध्ययन गरी दोषीउपर कारवाहीका लागि माग गरिएको छ ।
