मधु पन्थी, पोखरा ।
गण्डकी प्रदेशसभा सदस्य एवंम् यसअघि मुख्यमन्त्री सुरेन्द्रराज पाण्डे नेतृत्वको सरकारमा भौतिक पूर्वाधार विकास तथा यातायात मन्त्री रेशमबहादुर जुग्जालीले बजेट पुस्तिका प्रति असन्तुष्टी जनाउँदै २०८२ असार ९ गते संसदको रोष्टममै बजेट पुस्तिका च्यातनु भएको छ ।
भौतिक पूर्वाधार तथा यातायात मन्त्रालय अन्तर्गतको बजेटमाथि छलफल चलिरहेको समयमा प्रदेश सभाको रोष्टममा जुग्जालीले मन्त्रालयबाट विनियोजन बजेट न्यायिक नभएको बताउँदै बजेट पुस्तिका च्यात्नु भएको हो ।
सबैको प्रतिनिधित्व गरेर अर्थ मन्त्रालयको बजेट बहिष्कार गरी बजेट पुस्तिका च्यातेको उहाँले बताउनु भयो । गण्डकी प्रदेशले ल्याएको बजेटमा सत्तापक्षकै सांसदहरू पनि रुष्ट रहेको उहाँको भनाइ छ ।
दुई/दुई वर्ष म्याग्दीका लागि भौतिक पूर्वाधारबाट अन्याय भएको, भौतिक पूर्वाधार मन्त्रीलाई अझै बजेट नपुगेकाले आफू र प्रदेश सदस्य हरि भण्डारीको भागमा परेको बजेट पनि काटेर लैजान चुनौती दिनु भएको छ ।
त्यसैगरी नेकपा (माओवादी केन्द्र) गण्डकी प्रदेशसभा संसदीय दलको प्रमुख सचेतक कुसुम बुढा पुनले गण्डकी प्रदेशसभाको आठौँ अधिवेशनको सोह्रौँ बैठकमा आर्थिक वर्ष २०८२/०८३ को सेवा र कार्यका लागि प्रदेश सञ्चित कोषबाट रकम विनियोजन र खर्च गर्ने सम्बन्धमा व्यवस्था गर्न बनेको विधेयक, २०८२ माथिको छलफलमा भौतिक पूर्वाधार विकास तथा यातायात व्यवस्था मन्त्रालयको खर्च कटौती प्रस्ताव प्रस्तुत गर्नु भएको छ।
