मधु पन्थी, पोखरा । हेल्पिङ ह्याण्ड्स हेल्थ एजुकेशनको सहयोग तथा नेपाल नेत्रज्योति संघ हिमालयन आँखा अस्पताल पोखराले गण्डकी प्रदेशमा कार्यरत ट्राफिक प्रहरीहरूका लागि २०८२ जेठ २८ गते ४ सय ५० थान चस्मा वितरण गरेको अस्पताल व्यवस्थापन समितिका अध्यक्ष वरिष्ठ अधिवक्ता सुरेन्द्र थापामगरले बताउनु भयो ।
कार्यक्रममा नेत्रज्योति संघका महासचिव भरतबहादुर चन्दले गण्डकी प्रदेश ट्राफिक प्रहरी कार्यालयका प्रमुख प्रहरी उपरीक्षक दानबहादुर थापालाई एक समारोहका बिच चस्मा हस्तान्तरण गर्नु भयो ।
सोही कार्यक्रममा कास्की जिल्लामा कार्यरत १ सय जना पत्रकारलाई चस्मा वितरण गरिएको थियो । नेपाल पत्रकार महासङ्घ कास्कीलाई ६३ र संसदीय पत्रकार मञ्च, गण्डकीलाई ३७ थान चस्मा वितरण गरिएको हो ।
महासचिव चन्दले ट्राफिक र पत्रकारहरुको नि:शुल्क आँखा उपचारका लागि सम्झौता भइसकेकाले शिविरलाई व्यवस्थित बनाउँदै लैजानुपर्ने बतानु भयो ।
उहाँका नेपालमा बर्सेनि ३५ लाख बढीको आँखा उपचार गरिन्छ भने, ३ लाख बढीको अपरेशन हुने गरेको छ । उनले सङ्घको भावी योजनाका बारेमा पनि कार्यक्रममा जानकारी गराएका थिए ।
सङ्घले निकट भविष्यमै मेडिकल टुरिजम र वैदेशिक रोजगारीमा गएकाहरुलाई आँखा शिविर गर्दै जाने बताउनु भयो ।
‘हामीले मेडिकल टुरिजम्को अवधारणा अघि सारेका छौं । अब हिमालय आँखा अस्पतालमा उपचार गर्ने अनि निको भएपछि हिमाल हेरेर जाने गरी योजना बनाइरहेका छौं ।’ -उहाँले भन्नु भयो-‘विदेशमा गएर काम गर्ने नेपाली कामदारहरुलाई सम्बन्धित देशमै पुगेर आँखा शिविर गर्ने पनि योजना छ । मलेसिया, थाइल्याण्ड, कम्बोडियालगायत देशको एम्बेसीसँग कुरा भइरहेको छ ।’
