सिन्धुली । विगतमा ठूला बजारमा मात्रै सीमित रहेको राँगापाडाको किनबेच पछिल्लो समय सिन्धुलीको शनिबार हाटबजारमै हुन थालेपछि स्थानीय पशुपालक किसानलाई सहज भएको छ ।
शनिबार लाग्ने हाटबजारमा राँगा तथा पाडाको प्रत्यक्ष बिक्रीवितरण हुन थालेपछि किसानले आफ्नो पशुको उचित मूल्य पाउनुका साथै पशुपालनबाट आम्दानी बढाउन थालेका छन् ।
बिचौलियाको प्रभाव घटाउँदै खुला तथा पारदर्शी रूपमा पशुको खरिदबिक्री हुन थालेपछि किसान र वास्तविक व्यापारीबिच प्रत्यक्ष सम्पर्कसमेत स्थापित भएको छ ।
विगतमा गाउँघरमै पुग्ने बिचौलियाले किसानको बजारसम्बन्धी जानकारीको अभावको फाइदा उठाउँदै राँगापाडा कम मूल्यमा खरिद गर्ने र बजारमा लगेर बढी मुनाफा कमाउने अवस्था थियो ।
अहिले स्थानीय हाटबजारमै पशु बिक्री गर्ने व्यवस्था भएपछि किसानले अन्य व्यापारी तथा ग्राहकसँग मूल्य तुलना गर्दै मोलमोलाइ गर्न पाएका छन् ।
स्थानीय तह तथा हाटबजार व्यवस्थापन समितिले पशुको स्वास्थ्य परीक्षण, नापतौल तथा सुरक्षित कारोबारका लागि सहजीकरण गर्दै आएका छन् ।
यसले पशुको कारोबारलाई थप व्यवस्थित र विश्वसनीय बनाउन सहयोग पुगेको किसानहरूको भनाइ छ ।
हाटबजारमा राँगापाडाको कारोबार बढ्दै गएसँगै पशुपालनलाई व्यावसायिक रूपमा अघि बढाउन किसानसमेत प्रोत्साहित भएका छन् ।
पशु बिक्रीबाट किसानको हातमा सोझै नगद आउने भएकाले घरायसी खर्च व्यवस्थापन गर्न तथा पुनः नयाँ बाच्छापाडा खरिद गरी पालनपोषण गर्न सहज भएको छ ।
राँगापाडाको स्थानीय हाटबजारमा हुने प्रत्यक्ष कारोबारले किसानको आम्दानी बढाउनुका साथै स्थानीय अर्थतन्त्रलाई चलायमान बनाउन र पशुपालनलाई आयआर्जनको भरपर्दो माध्यमका रूपमा विकास गर्न योगदान पुर्याएको छ ।
