ललितपुर । पत्रकारिता क्षेत्रमार्फत समाज, जनचेतना र स्थानीय विषयवस्तुको प्रवर्धनमा योगदान पुर्याएका सात पत्रकारलाई २०८३ जेठ १६ गते विभिन्न पुरस्कारबाट सम्मान गरिएको छ ।
नेपाल पत्रकार महासङ्घ ललितपुर शाखाको २५औँ वार्षिक साधारणसभाका अवसरमा आयोजित कार्यक्रममा उनीहरूलाई नगदसहितका विभिन्न पत्रकारिता पुरस्कार प्रदान गरिएको हो ।
हीरा–सिद्धि क्रियाशील पत्रकारिता पुरस्कारबाट राजधानी दैनिकका सम्पादक डिल्ली आचार्य र रातोपाटीका नरेश ज्ञवाली सम्मानित हुनुभएको छ ।
नेपाल पत्रकार महासङ्घ ललितपुर शाखाका पूर्वअध्यक्ष एवम् नयाँ सडक दैनिकका ज्ञानप्रसाद पौडेलले धर्मरत्न शाक्य जीवन्त पत्रकारिता पुरस्कार प्राप्त गर्नुभयो भने नेपालखबरका जनार्दन पोखरेललाई राधा–लक्ष्मण क्रियाशील पत्रकारिता पुरस्कार प्रदान गरियो ।
क्यान्सरसम्बन्धी जनचेतनामूलक सामग्री प्रकाशनमा योगदान पुर्याएको भन्दै दियोपोष्टकी रीता बुढाथोकीलाई सम्राट आचार्य स्मृति पत्रकारिता पुरस्कार प्रदान गरिएको छ ।
त्यसैगरी, ललितपुरका विषयवस्तु उजागर गर्न योगदान पुर्याएको भन्दै नेपाल टेलिभिजनका ईश्वर महर्जन र मिडियासञ्चार डटकमका केदारनाथ दाहाललाई ललितपुर पत्रकारिता पुरस्कारबाट सम्मान गरिएको छ ।
कार्यक्रममा पूर्वप्रधानन्यायाधीश प्रकाशमान सिंह राउतले सम्मानित पत्रकारहरूलाई बधाई दिँदै लोकतान्त्रिक व्यवस्थामा पत्रकारिताको भूमिका अझ जिम्मेवार र प्रभावकारी हुनुपर्ने बताउनुभयो ।
उहाँले पत्रकारहरूले वाक तथा अभिव्यक्ति स्वतन्त्रताको सदुपयोग गर्दै नागरिक अधिकार संरक्षणमा महत्वपूर्ण योगदान पुर्याइरहेको उल्लेख गर्नुभयो ।
सोही अवसरमा नेपाल पत्रकार महासङ्घ ललितपुर शाखाले प्रकाशन गरेको ‘ललितपुरको पत्रकारिता इतिहास’ पुस्तक पनि सार्वजनिक गरिएको थियो ।
शाखाका अध्यक्ष रामहरि कार्कीले लेखन/सम्पादन गर्नुभएको पुस्तक विभिन्न चार खण्डमा विभाजित छ ।
वार्षिक साधारणसभाले सचिव दिपक अर्यालले प्रस्तुत गर्नुभएको प्रगति प्रतिवेदन र कोषाध्यक्ष कृष्ण पौडेलले प्रस्तुत गर्नुभएको आर्थिक प्रतिवेदन सर्वसम्मत पारित गरेको अध्यक्ष मण्डलका अध्यक्ष प्रभुनारायण बस्नेतले जानकारी दिनुभयो ।
त्यसैगरी साधारणसभाले नेपाल सरकारले सञ्चार जगतलाई खुम्च्याउन गरेका पछिल्ला निर्णय र पत्रकार तथा सञ्चार माध्यममाथि बढाएको दबाबप्रति भर्त्सना गर्दै प्रेस स्वतन्त्रताको सम्मान गर्न आग्रह गर्नेलगायतका समसामयिक प्रस्ताव पारित गरेको अध्यक्ष मण्डलका सदस्य रमेशप्रसाद तिमल्सिनाले जानकारी दिनुभयो ।
