पोखरा । सात वर्ष अघि २०७५ सालमा स्थापना भएको पोखरा महानगरपालिका-८, नागढुङ्गास्थित हातेमालो नागढुङ्गा आमा समूह महिलाको आत्मनिर्भरता अभिवृद्धिमा उल्लेखनीय भूमिका निर्वाह गर्दै आएको छ ।
स्थानीय समुदाय तथा टोल विकासमा आबद्ध महिला दिदीबहिनीलाई आर्थिक र सामाजिक रूपमा सशक्त बनाउने उद्देश्यका साथ स्थापना गरिएको उक्त संस्थाले समयअनुसार महत्वपूर्ण प्रगति गर्दै आएको समूहकी अध्यक्ष चेतमाया पङ्गेनी पौडेल (गीता) ले जानकारी दिनु भयो ।
“ऐक्यबद्धता, सभ्यता र हिंसामुक्त समाजः हाम्रो अभियान” भन्ने मूल नारालाई आत्मसात् गर्दै समूहले महिला सशक्तिकरण तथा नेतृत्व विकाससम्बन्धी पाँच दिने तालिम सञ्चालन गरिरहेको छ ।
पोखरा महानगरपालिका-८, नागढुङ्गा, कास्कीको आयोजना तथा सामाजिक विकास, युवा तथा खेलकुद मन्त्रालय, एकीकृत सेवा कार्यालय कास्कीको आर्थिक सहयोगमा उक्त तालिम २०८२ चैत १२ देखि १६ गतेसम्म ब्राह्मण समाज नेपाल, ज्ञानकुञ्ज टोलस्थित सभाहलमा सञ्चालन भइरहेको छ ।
कार्यक्रमका प्रमुख अतिथि गण्डकी प्रदेशका सामाजिक विकास, युवा तथा खेलकुद मन्त्री विन्दुकुमार थापाले कार्यक्रमको ब्यानरमा हस्ताक्षर गर्दै तालिमको शुभारम्भ गर्नु भयो ।
मन्त्री थापाले महिला सशक्तिकरण तथा नेतृत्व विकाससम्बन्धी तालिमले महिलामा आत्मविश्वास अभिवृद्धि गरी नेतृत्व क्षमता विकासमा महत्वपूर्ण योगदान पुर्याउने विश्वास व्यक्त गर्नु भयो ।
उहाँले तालिम केवल औपचारिकतामा सीमित नरही व्यवहारमा उतार्न सकिने ज्ञान र सीप आर्जन गर्न प्रशिक्षार्थीहरूलाई आग्रह गर्नु भयो ।
उहाँका अनुसार महिला सशक्तिकरण बिना समृद्ध समाज निर्माण सम्भव छैन । प्रदेश सरकार यस्ता सकारात्मक पहललाई निरन्तर प्रोत्साहन गर्न प्रतिबद्ध रहेको उहाँले बताउनु भयो ।
समुदाय स्तरमा सञ्चालन हुने यस्ता तालिमले जीविकोपार्जन मात्र नभई आत्मसम्मान, सिर्जनशीलता र अरूको जीवनमा खुसी थप्ने आत्मविश्वास विकासमा समेत योगदान पुर्याउने उहाँको भनाइ थियो ।
कार्यक्रममा नेपाल गृह श्रमिक सङ्घका केन्द्रीय उपाध्यक्ष लालीमाया शर्मा रेग्मी, ब्राह्मण समाज नेपाल कास्कीका अध्यक्ष रामप्रसाद बस्ताकोटी, पत्रकार कमल पौडेल ‘अथक’ तथा महिला चेम्बर अफ कमर्स कास्कीकी अध्यक्ष जमुना पौडेलले शुभकामना मन्तव्य व्यक्त गर्नुभएको थियो ।
उहाँहरूले आत्मनिर्भरता, उद्यमशीलता र नवप्रवर्तनका लागि यस्ता तालिम प्रभावकारी हुने र स्थानीय उत्पादनलाई प्राथमिकता दिनुपर्नेमा जोड दिनु भयो ।
तालिममा पत्रकारद्वय कमल पौडेल ‘अथक’ र दुर्गा अधिकारी तथा सामाजिक अभियान्ता विद्या पराजुलीले सहजीकरण गरिरहनुभएको छ ।
समूहकी अध्यक्ष चेतमाया पङ्गेनी पौडेल (गीता) को अध्यक्षतामा सम्पन्न कार्यक्रममा संयोजक एवम् सदस्य पूर्णमाया जुग्जालीले स्वागत मन्तव्य तथा कार्यक्रमको उद्देश्य प्रकाश गर्नुभएको थियो भने सचिव विद्या पराजुलीले कार्यक्रम सञ्चालन गर्नुभएको थियो ।
चैत १६ गतेसम्म सञ्चालन हुने उक्त तालिममा पोखरा महानगरपालिका वडा नं. ४, ७, ८, ९ र १७ भित्रका आमा समूहका करिब ८० जना प्रतिनिधिहरूको सहभागिता रहेको छ ।
