पोखरा । “सबैका लागि एक, एकका लागि सबै” भन्ने नारासहित सहकारी ऐन २०७५ अन्तर्गत स्थापित धारापानी महिला बहुउद्देश्यीय सहकारी संस्था लि., पोखरा महानगरपालिका-५, जनहित मार्ग, कास्कीको आयोजनामा दुईदिने उद्घोषण तथा क्षमता अभिवृद्धि तालिम सम्पन्न भएको छ ।
२०८२ माघ १६ र १७ गते धारापानी मन्टेश्वरीको प्राङ्गणमा आयोजित तालिमको उद्घाटन समारोहमा बोल्दै प्रमुख अतिथि जिल्ला सहकारी सङ्घ कास्कीका सदस्य एवम् निर्वतमान अध्यक्ष चन्द्रावती गैरे अधिकारीले यस्ता तालिमले व्यक्तित्व विकास र नेतृत्व क्षमता अभिवृद्धिमा महत्वपूर्ण भूमिका खेल्ने विश्वास व्यक्त गर्नु भयो ।
उहाँले स्थानीय समुदायमा सक्रिय दिदीबहिनीहरूको नेतृत्व विकासका लागि यस्ता तालिम प्रभावकारी, बौद्धिक तथा उपलब्धिमूलक हुने उल्लेख गर्नु भयो ।
उद्घाटन कार्यक्रममा विशेष अतिथि पोखरा महानगरपालिका कार्यपालिका सदस्य तथा वडा नं. ५ की सदस्य हरिमाया विश्वकर्माले तालिम सहभागीहरूका लागि उत्प्रेरणादायी र उपलब्धिमूलक हुने बताउनु भयो ।
उहाँले सहभागीहरूलाई सक्रिय सहभागिताका लागि आग्रह गर्दै कुनै विषयमा अस्पष्टता भए हिनताबोध नगरी जिज्ञासा राख्न अनुरोध गर्नु भयो ।
दुई दिनसम्म सञ्चालन भएको तालिममा साहित्यकार तथा प्रमुख प्रशिक्षक पत्रकार कमलप्रसाद पौडेल ‘अथक’ले बोल्ने कला, क्षमता अभिवृद्धि तथा प्रतिवेदन लेखनसम्बन्धी विषयमा सहजीकरण गर्नुभएको थियो ।
तालिमको प्रभावबारे बोल्दै लेखा समिति संयोजक मैयाकुमारी भुर्तेल, मन्टेश्वरी व्यवस्थापन समिति अध्यक्ष कमला त्रिपाठी, मन्टेश्वरीका प्रिन्सिपल शारदादेवी शर्मा तथा सहकारीका प्रबन्धक कल्पना विश्वकर्माले तालिमले समूह परिचय, कार्यक्रम सञ्चालन र आफ्ना समस्या तथा अनुभूति सहज, प्रभावकारी, कुशल र पारदर्शी रूपमा प्रस्तुत गर्न सहयोग पुग्ने धारणा राख्नु भयो ।
सहभागीको तर्फबाट मन्तव्य राख्दै आसमा विश्वकर्माले तालिमबाट सिकेका ज्ञान तथा सीपहरू समुदायस्तरमा हस्तान्तरण गर्ने प्रतिबद्धता व्यक्त गर्दै तालिम फलदायी, व्यवहारिक र ज्ञानवर्धक रहेको बताउनु भयो ।
कार्यक्रम सहकारी अध्यक्ष गितादेवी पौडेलको अध्यक्षतामा सम्पन्न भएको थियो । स्वागत मन्तव्य तथा कार्यक्रमको उद्देश्यबारे उपाध्यक्ष शारदा गिरीले प्रकाश पार्नुभएको थियो भने कार्यक्रम सञ्चालन सचिव शारदा भट्टराई अधिकारीले गर्नुभएको थियो ।
तालिममा सहकारीका सञ्चालक समिति, विभिन्न उपसमिति (ऋण, कृषि, शिक्षा, लेखा, खोज तथा अनुसन्धान), मन्टेश्वरी व्यवस्थापन समिति, शिक्षक तथा कर्मचारीहरू गरी ३५ जनाको सहभागिता रहेको थियो ।
